Shillong, Sept 15: Ri-Bhoi district-o donggipa Umiam-Block 5-o donggipa nokdangrangna bijoli sringe on·na gita power department ja·kurangko de·atenga ine a·dokni power minister Pa James Sangma, Butbar salo Umroi-ni MLA Pa George B Lyngdoh-ni mitam nokdangrangosan bijoliko sringenga ine House-o sing·anina aganchakangaha.
Ri-Bhoi-o donggipa 16,369 nokdangrangna bijolirangko sringmanaha ine power minister House-o u·iataha.
Iana minister-ni aganchaka sing·a gita ong·jaenga ine Pa Lyngdoh aganskaaha, maina sing·anian mongsongbate Umiam block 5-ni giminsa ong·engachim jeon indita bilsirangna bijolirangko sringe on·na dongkuja, indiba power minster-ni miksonge aganchakaniara Ri-Bhoi district Saubhagya-ni giminsa ong·skaa,” ineba ua talataha.
Iana, Umiam block 5 biapara adita napdrabae dongenggiparangni ning·o ga·aka, jeon chu·gimik nokdang 83 rangni gita gnang aro ianoni ge 25 nokdangrangna dikdiksana bijolirangko sringe on·chengenga ine Pa Sangma aganchakangaha.
Ia block 5-o minggni neng·nikgipa mamlarang dongani gimin pilakkon nipiltaiatchina gitaba Umroi-ni MLA, power minister-ko didiangkuaha.
Uni aganani gita, skang 1960 bilsio jolo ong·telaigpa obostako chagrongani gimin a·nokgipa aro donggiparangni gisepo bharana tik ka·grikaniko dakaha jeon uamang ru·uta bilsirangoni dongbaenga. Bhara on·na gita songgigrikaniko dakengmiting apsan somoion bijoliko sringe on·na gita kamrangkoba ka·engachim indiba karen post-rang dongjani gimin aro post-rangko nangdapani gimin uno donggiparangna bijoli sringe on·na man·na gita post-rangko songe on·china MeECL-o mol·molaha.
Iana talataniko on·engon, Umiam-Block 5-o donggipa ge 25 nokdangrang ua biapo songdongkamaniko janape talatachi soi ka·angtokaha ine aganenba, ua biapo nangdapgipa karen post-rangko songe on·na ja·kurangko de·atenga aro distribution transformer-ko songna nangenggipa gimikna gong lak 8,37,637 mangko chamsoaha aro iako ru·utgijan a·bachengatna man·gen ine iachi minister-na ka·dongataniko on·a ineba Pa Sangma janapatjolaha.
