Shillong, Feb 7: Urban Affairs Department-ni Minister In Charge Pa Sniawbhalang Dhar, Ribhoi District-ni Kyrdem songo 200 acre-mangni gita a·arangko jabol galram biapna sorkari ra·nasienga ine AITC-ni Umroi MLA Pa George B Lygdoh-ni sing·anina aganchakaha.
Iani bidingo ‘public hearing’-ko kachario re·anggipa January 8 tariko ong·ataha jeon ua biapni bidingo rongtale manderangna ui·atanikoba on·angaha ine Pa Dhar ui·ataha.
Adita dolrang jabol galram biapko tariani bidingo jegalanirang dongenga unigimin iani bidingo bon·kamgipa report-ko Ri Bhoi District-ni Deputy Commissioner-oniko sengkuenga ineba agandaha.
Sorkari maming dakeba manderangni namnikgijani kosako dakdraani dongjawa aro je dakgipa raiko ra·naba manderang baksa agangrikchenganikon dakgen. Unigimin chu·gimikgipa DPR-ko gimik kamrangko matchotman·osa on·gen ineba Pa Dhar talatdapaha.
Pa Lyndoh-ni janapani gita, ua jolni samtangtang jolrango chiring chibisikrang dongachim aro jako ra·e kam ka·enggipa Department name sandichenganiko dakgija jabol galram biapna ra·anichisa ua jolo songdongenggiparangna kenchaksoaniko on·engachim.
Pa Dhar jako ra·e ka·enggipa Department-ko ua jolni MLA baksa nangrime indonga project-ko ka·china aganaha. Ua jolni manderangni a·selko angona re·bae agankuja dipet-de angade ma·sikujaengachim ine Pa Dhar aganaha.
Congress doloni ra·gala man·gipa Mawlai-ni MLA Pa Process T Sawkmie-ni West Jaintia Hills- Jowai jilla-o pangkamgipa jabol galchakram-ko donchina sorkariko aganon, iani bidingo sorkari rongjrien ra·enga, unigimin chinga man·a dipet taraken ia neng·nikaniko namatna jotton ka·enga ine aganchakaha.
Jabol galchakram-na biaprangko ra·engon, ian samtangtangko nosto ong·jana simsakbena nanga aro dongimin niamrangko name ja·rikna nanga ine Nongthymmai MLA Pa Charles Pyngrope aganpaaniko on·aha.
Sorkari Ri Bhoi-o biap ra·enggipaora jabolrangara so·e bon·gipako ma so·gijagiparangko galgen ine Pa Pyngrope sing·doon, Sorkari iako bangbanggipa biapo jabolko galjawa aro name daken Solid Waste Management Rule 2016-o pangchakesa kam ka·gen ine Pa Dhar aganchakaha.
