Shillong, Oct 22: A·songo songdongenggipa manderangna bichalrangko ka·e on·gipa Judiciary-ni kamna suk ong·gijani gimin aganangtaikuanio, ma·mongni Law minsiter Pa Kiren Rijiju mija Sonibar salo Shillong songjinmao program ong·atgipa bakko ra·angenba, iana skang uni agananggipa kattako manderang jegaltokaha inako ra·chakna man·jae batesa uni kattarangko bang·aan namnike ra·chakangtokaha ine aganangskaaha.

“Anga ong·akosa aganani gimin bang·a manderangan angani kattako ra·chaktokaha, jegala ong·ja. Ian gital katta ong·ja, unbaksana, an·chingni a·songo pilak bichal ka·e on·ani kamrang maidakode bilakna man·gen, Law Minister ong·anio anganiba daito ong·a. Ramram mandena bichalko ka·e on·aniko an·ching ru·utatode, miksonganian chu·sokjawaha,” ine Pa Rijiju parakataha.

Indake nikatna man·gen, chong·motan adita salrangna skang, ukilrang ba judge-rang manderangna bichalko ka·e on·ani pal sawa aro sako bichal ka·e on·gipa judge-rangna seokgen uko tik ka·anion ata kontarangna somoiko bon·ata ine aganangan baksa, collegium system-ko donmitapani ba donnuani gnanggipa ong·a ineba aganangahachim aro ia kattako ra·e manderangni adita jegalanirangkoba nikangna gita man·aha.

Pa Rijiju-ni janapangkuani gitade, a·songni judiciary, executive, legislature-ni kamrangni gimin ua talate on·aha aro uamang gimikan a·songna dangdike on·na gitasa on·kangmanaha ine uni miksonge agananio tikkosan aganaiaha.

“Kamtangtangko ka·china bilko on·gimin gitasa an·chinga sakantian ka·na nanggipa ong·a, sakgipinni biap ba a·damona re·ange niamrangko nangai-nangjai bak dakna gita nangja, batesa a·songni niam-bidiko talatgimin gita daito tangtangko jako ra·e uarangna gisik on·e kamrangko tik ong·e ka·na gita nanga,” ineba Rijiju parakataha.