Tura, Nov 11: Sukrobar salo, Meghalaya a•dokni Chief Minister Conrad K Sangma, East Garo Hills a•jani gital Rongjeng Civil Sub-Division-ko, Assembly-ni Deputy Speaker Timothy D Shira, Rongjeng-ni MLA Jim Sangma, North Tura-ni MLA Thomas A Sangma, Dalu MLA Brening Sangma, Kharkutta MLA Rupert Momin aro Bajengdoba MLA Pongseng Marak-ni mikkango songe on•angaha.
Rongjeng-ko Civil Sub-Division songe on•china jolo songdongenggipa manderang bilsi 40 batpile dabiengahachim ine nikna man•a. 2017 bilsio Rongjeng-o Administrative Unit-ko songahachim aro da•o iako Sukrobar salo, a•dokni Governor-oni u•iatanichi gital Sub-Division songe on•angaha.
Ia gital sub-division-o Rongjeng C&RD Block-koba man•chapgen aro ia sub-division-ni ning•o komibeoba dam 180 songrang donggen.
Rongjeng Civil Sub-Division-ko songe on•angani somoio a•dokni Chief Minister jinmana aganprakangengon, ia gital sub-division-ko man•ahani gimin Rongjeng jolo songdongenggipa manderangna an•tangni kusi ong•chakaniko parakangenba, ia gital Civil Sub-Division-ko songani bidingo u•iataniko Rongjeng Civil Sub-Division-ko gital SDO Reuben Momin-na pakwate on•angjolaha.
Ia gital sub-division-ko manderangna pakwate on•angengon, manderangni indita bilsirangna nangnike dabianiko da•alo chu•sokate on•na namen kusi ong•a ine Chief Minister parakataha.
Uni pagipa Purno A Sangma sagi, Rongjeng-ni manderang baksa melibegipa ong•achim ine janapatengon, a•doko dingtanganiko aro namroro silroroaniko ra•bana gita sorkari, niksamsoani gnangsa kamko ka•enga ine Sangma parakataha.
Iana skang, Rongjeng-ni MLA Jim Sangma-ba jinmana aganprakengon, manderangni ru•utbea bilsirangna dabianiko chu•sokate on•ahani gimin Chief Minister-ko mittelpilangaha. Rongjeng Civil Sub-Division-ko songna nangani gimin Purno A Sangma sagisa ku•rangko on•chenggipa ong•ahani gimin ia nangnikaniko chu•sokate on•ahani giminba ua Chief Minister-ko mittelpilangaha.
