Shillong, April 13: Meghalaya a·dokni Job Reservation-na Roster system-ko a·doko ra·gatnasienggipani bidingo A·chik aro Khasi-Jaintia jatgittamni gisepo jera-ra·grikanirang chotchangjaengon, ia mamlako man·adipet gong·rake tik ka·e on·na man·jagenchimode skango MBOSE-ni somoio gita chacha apsan obostako chagrongtaina gita nanggen ine Hynniewtrep Youth Council (HYC), Bristibar salo a·dok sorkariko mikrakatangaha.
“Ia mamlani bidingo a·dok sorkari jatgiitamni namgnina chanchie kamko ka·jagenchimode Meghalaya-o skang MBOSE-na so·so-jengjeng ong·a gita apsan obosta ong·tainaba gnang ine gisik ra·atpiltaianiko dakenba, roster system-ko ra·gatani mamlako cabinet-o tom·e chanchirimachi ba assembly-o chanchirimachi ba gimik political dol tom·e chanchirimachi ong·oba, a·dok sorkari ia niamni gimin man·adipet gong·raken tik ka·aniko dakchina gita chinga sorkario mol·molna nangnika,” ine ia roster system-ko 2022 bilsioni chanchakate mikkangchini giminsa a·doko songpanggipa jatgittamni namgnina ra·gatchina gita dabie a·dokni chief secretary DP Wahlang-na memorandum-ko on·angani ja·man HYC-ni padot Robertjune Kharjahrin, kobor ra·timgiparangna aganangaha.
“Ia mamlako ra·e da·alo Khasi -Jaintia aro A·chik jatrangni gisepo adita ma·sisretanirang ong·enganiko nikna gita man·engahani gimin, ia niamko ra·gatani gimin chingni chanchie ra·baenggipako knachakgen ine chinga ka·donga maina sorkarini kaman iandakgipa neng·nikanirangko namatna kamko ka·nasa ong·a aro ma·sisretgrikani mikkangchi ong·angkuaniko chinga nangnikja ine aganenba, ia mamlani gimin cabinet tom·anio uamang damsan chanchirimaniko dakgen ine chief secretary chingna u·iataha,” ineba Kharjahrin agandapataha.
“Ia roster system-ni gimin aganchakanirangko niatgenchimode, minister-rang, kachariko dos galenga aro kachariba iani gimin chanchirime kamko ka·na sorkarini jakosa ine aganskaaniko nikna man·enga, jeni a·sel da·alo manderangde maming namgni donganiko nikatjaenga ine janapatkuenba, a·dok sorkari ia neng·nikanirangko namatna gong·raken kamko ka·genchimode, ia mamlaba matchotgnokchim aro Khasi-Jaintia aro A·chik jatgittaman da·alo sorkarini kamrangna dorgastorangko galpiltaina gita man·gnokchim ineba ua aganangkuaha.
Iakoba poraie nina man·gen: West Jaintia Hills-o Assam sorkarini niam gri rama tarianiko dontongata
