Tura, April 4: Meghalaya a•dokni Job Reservation Policy-o A•chik jatna chamgiminoniko bilsi 50-na baten A•chikrang man•jahani gimin an•tangtangna on•gimin bilo pangchake jatni man•na nanganiko man•kujaskal a•doko Roster system ra•gatchina dabianiko A•chik Conscious Holistically Integrated Krima (ACHIK) dol watgaljawa ine parakataha.
ACHIK me•chik dolni secretary Reche Chambugong Wa•ge-ni parakatani gitade, Job Reservation Policy-o Roster system-ko rai on•anichisa bilsi 50 batpile A•chikrangna tikatgimin bak rengsiko man•tokjaha ine ma•sina man•aha aro ian A•chikrangni man•na nangenggipa bak rengsian ong•ani gimin A•chikrang an•tangtangni man•gnina ku•rangko on•na gita chu•gimik bil donga.
Indake ong•engon, Tura-ko Winter/Second Capital songchina dabianiba ACHIK dolni minggipin mongsonggipa dabiani ong•enga aro iako chu•sokate on•kujaskal uamangni dabianiko dontongjawa ineba Reche Chambugong Wa•ge parakataha.
Tura-ko Winter ba Second Capital songchina dabianio dingtang dingtang dolrangba bakrimaniko on•engani gimin mittelpilaniko parakatengon, Meghalaya a•dokko man•chengani somoion Tura-ko Winter Capital dakna songgigrikani dongani gimin Khasi jong-ada, no-abirangba ia dabianio bakrimaniko on•gen ine ACHIK me•chik dolni secretary, an•tangni ka•dongchakenganiko parakataha.
