Shillong, April 5: Meghalaya Assembly-o roster system-ni gimin jinma chanchirimna man·na gita special session-ko ong·atchina Khun Hynniewtrep National Awakening Movement (KHNAM), a·dokni Governor Phagu Chauhan-ko didiangaha.
Roster system-ni bidingo ra·anggipa PIL-ko jegalate, badia bilsirangoni roster system ra·gataniko a·bachengna miksongenga, uko Assembly-o chanchirimchengchina gita Meghalaya High Court raiko on·atani ja·man, roster system-ni bidingo chanchirimna Assembly-ni special session-ko ong·atchina KHNAM didiangaha.
Iani bidingo KHNAM-ni vice president Thomas Passah, talataniko on·atengon, a·doko songdongenggipa pilak manderangni namgnina Roster system-ni gimin Assembly-o chanchirimna man·na gita Indian Constitution-ni Article 174-ni ning·o special session-ko ong·atchina Meghalaya Governor-o bilaken dabienga ine parakataha.
Passah-ni aganani gitade, roster system-ni bidingo Assembly-ni membor-rang an·tangtangan chanchie ja·kuko de·na man·a ine High Court-ba raiko on·manahachim.
Budget session-ni somoio roster system-ni gimin chanchirimna gita Assembly-ni Speaker on·jaha ine an·tangni suk ong·gijaniko parakatengon, ian a·dokni badiaba jatna namgni ong·na gita MDA-1 aro MDA-2 sorkarini State Reservation Policy-ko rakkina aro Roster system-ko ra·gatna jotton ka·aniko mesokanisa ong·enga ine KHNAM-ni vice president parakataha.
