New Delhi, Jan 11: Da•ororo giproroenggipa sabisini tikarang, jekon India a•songo re•baenggipa January 16 tarik dipet a•bachengatna siengachim, ia tikako on•ani skanggipa bakna korosko ma•mong sorkari gamgen ine Sombar salo, a•songni Prime Minister Narendra Modi parakataha.
“Kror gittam health worker aro frontline worker-rangna skanggipa bako tikarangko su•ani korosko a•dokrang gamjawa indiba ma•mong sorkarisa gamgen,” ine ia tikarangko su•ani program-rangni bidingo dingtang dingtang chief minister-rang baksa agangrikani ja•mano Prime Minister Modi parakataha.
Skanggipa bako, sanna bananiko on•enggiparang aro mandena chel•chakaniko on•enggipa dingtang dingtang sipai dolrangko man•chape ia sabisiko mikkango donge warachakenggipa manderangna on•angchenggen ineba Prime Minister parakataha.
“Gnigipa bako bilsi 50 badegimin manderang aro ma•manti saanirang donge bilsi 50 komikuenggipa manderangna ia tikarangko on•angskagen,” ineba ua parakataha.
Chief minister-rang baksa tom•e chanchirimani ja•man jinmana aganprakatengon, a•songni scientist-rang aro mandeko sannani a•bao u•i-ma•sigipa manderang, a•songo songdongenggipa manderangna ia tikarangko on•na gita pilak nanga tarisamsoanirangko dakmanaha ine PM Modi parakataha. Tikako ra•manani ja•manoba an•tangtangna simsakchina gitaba ua a•songo songdongenggipa manderangko didiataha.
Oxford-AztraZeneca-ni Covishield aro Bharat Biotech-ni tarigipa Covaxin-ko adita salrangna skangsan, sabisiko chel•chakna gita a•songni Drugs Controller General of India (DCGI) ra•chakahachim.
Indake ong•engon, da•o dipet a•gilsak gimiko sak kror 2.5-mangni gitasan manderang ia sabisini tikarangko ra•engkua ine Prime Minister talatangenba, da•o adita jarangni gisepon a•songo kror 30 manderangna ia tikako on•na nanggen ine parakataha.
Ia tikarangni bidingo tol•e jangbingbangatanirang dongjana gita name nirok sandichina ua dingtang dingtang a•dokni dilgiparangkoba didiataha.
