Guwahati, Dec 3: Gimaangroroenggipa adita ma·malni jonturangoniko man·gipa dingtang dingtang bakrangna agreba, sagal chiningo donggipa janggi gnanggiparang, mongsongbate chini jo·ong rokomsa sea fan-oniko man·bagipa bosturangko niam gri badingsrukanirangko dakenggipa manderangko mijal Butbar salo Guwahati songjinmaoniko Assam Forest Department aro Wildlife Crime Control Bureau (WCCB) nangrime rim·aha.
Butbar salo, forest department aro WCCB nangrime kamrangko ka·atanichi iandakgipa bosturangko badingsrukaniko rim·anio ian a·songo dal·batsranggipa chu·sokaniba ong·enga.
Uamangko rim·anio mongsongbate chu·sokanide, Guwahati-ni niksenggipa Kamakhya Temple sambani Nilachal a·bri ja·rekoniko rim·gipan ong·aiaha. Ua manderangoniko sekgimin bosturangara – kg 50 ong·gipa sea fan, ge 14 musk deer pod, kg 2 ong·gipa musk pod-ni tong·rang-tong·tang dakgiminrang, Monitor Lizard-ni ge 43 be·enni bakrang, kg 1.5 ong·gipa Porcupine scales aro spike, iarang gimikko sekaha, ine Assam Forest department Bristibar salo parakataha.
Iana skang mangmang, buringo donggipa aro chio donggipa jonturangko niam gri pal-badinganiko rim·a man·ode rakbatgipa niamo pangchake sastirangko on·china gita Assam Forest Minister Parimal Suklabaidya ge·etaniko on·angahachim.
Forest department-oni koborrangko on·atani gitade, dal·begipa sagal rikamrangona hajal mile-rangni gita a·jaoni namen chel·beoba, salgro-salaram joloniko iandakgipa chini jonturangko niam gri dake badingsrukenggipa manderangko ian skanggipa chang ong·e rim·aniba ong·aha.
Skanggipa rim·aniko Ganeshguri Lakhi Mandir-o dakchengaha, jeon Wildlife Protection Act, 1972 ni Schedule-I -o janapgimin rokomsa chini jontu sea fan-ni ge 600 bimangni bakrangko man·aha. Iano saksako rim·aha aro iani gimin sing·rikkiataniko dakon, sandidapaniko dakange sakgni gipinrangkoba rim·dapna gita cholko man·aha.
Uamangoniko, kg 34 ong·gipa sea fan, kg 14 ong·gipa chanchichipgipa musk pod-ni bakrang, kg 1.5 ong·gipa porcupine spikes, Hathjora-ni ge 43 bimangni bakrang baksana ma·sina man·kugijagipa buringni jonturangni be·enni bakrangkoba sekaha.
“Sagal chio donggipa jonturangko badingsrukaniko sekanio a·songo ian dal·batsranggipa ong·enga ine chingna aganataha. Iano bang·a dingtang dingtang niam gri badingsrukaniko dakenggipa manderangni melie kam ka·atenganirang dongna nanga ingipao ja·kol sananiko dakna gita chingoni sandiatanirangko dakna a·bachengaha. A·songgipin baksa nangrime kam ka·ani iano dongnaba gnang” ine Guwahati, East Forest division-ni DFO, Rajib Baruah aganaha.
Sea fan-ara rokomsa chini jontu ong·a jekon nitobegipa rongrangchi tokgimin a·gao chagipa, cheksirang donggipa bipangrang gita nikpila indiba uarangara mongsongde ugita apsanpagipa corals aro jelly-rang gita matbatburingni bakan ong·a. Sea fan-ara namen chonchongipa matburingrangni toprime bimang ge·san dake kam ka·gipa ong·a, ine officialrang agandapaha.
