Shillong, Nov 25: Meghalaya a•doko sak 12 MLA-rangni ong•kate katgrimani a•sel Congress dol bilgriatako man•ahaoba Meghalaya a•doko Congress dol sikujawa aro uamang ia ra•bianiko ra•e kamko ka•angkugen ine Meghalaya Pradesh Congress Committee (MPCC)-ni president Vincent Pala parakataha.
Gipinrangkode uamang ong•katna miksongenga ine ma•sisoani giminan ja•kurangko de•samsoengachim ine janapatengon, Charles Pyngrope-ni ong•kataniara uamangna jagokmanpilani gita ong•aha ine Pala parakataha.
Uko MPCC-ni president songani gimin doloni ong•kataha ine agananiara pa•sikanisan ong•aia ine janapatengon, uamango da•o bilrang dongjahani giminsa uamang Congress-oni ong•kate kataha ine Pala parakataha.
“Bil donggipa bang•bata dilgiparangan da•o bilgri gita ong•ahani gimin uamangni gisepo dongtogijanirangko man•ahakon aro iani giminba uamang doltangko wate katahakon. Angko anga an•tangde MPCC-ni president songjaha indiba president dingtangko nangniktokesa angko MLA aro MDC-rang songaha. Angko president songna skangba AICC, changgnina kingking dilgiparang baksa agangrikchengaha aro uamangni da•o Congress-oni ong•kataniara angni a•sel ong•ja indiba uamang da•o bilgri ong•ahani giminsa ong•a. Angko president songanina ong•kata ine agananide pa•sikanisan ong•aigen maina a•bachengonin anga uamangko ong•kate katna miksonganirang donga ine ma•sien dingtang dingtang kamrangko ka•soahachim. Batanggimin salgittamni gisepoba anga dingtang dingtang constituency-rangona wenangaha,” ine MPCC-ni president aganaha.
Indake ong•engon, Meghalaya a•dokni manderang jahatko wate katjawa ine Congress dolni MLA Ampareen Lyngdoh parakatskaaha.
“Dilgiparang dolsaoni dolsaona wate katgenchimoba maming ong•ja indiba Meghalaya a•dokni manderang dingtanganiko nangnikenga ong•ode dingtanganinasa pu•onchina. Iana an•ching duk ong•na nangja maina ian Meghalaya a•doko brena man•gijagipa aro dolsaoni dolsaona katjojogijagipa dilgiparangko rimbaskana namgipa chol ong•enga,” ine Lyngdoh aganaha.
Dilgiparangni iandakgipa kamrangan Meghalaya a•dokko bilgriroroatenga ineba Lyngdoh aganaha.
Sak 12 MLA-rangni wate katahani gimin Congress bilgrijawa aro uamang gital dake re•mikkanggen ineba ua parakataha.
