Shillong, Jun 6: Ia chang Lok Sabha election-o NPP-na pu•onronggipa lak 2 voter-rangoni sak 50,000-mangni gitasan gipin dolrangna pu•onaha ine Bristibar salo, NPP-ni dilgipa aro a•dokni Cabinet Minister Rakkam A Sangma a•kangataha.
Tura Lok Sabha constituency-o Congress dolni candidate Saleng A Sangma, NPP-ni Agatha K Sangma-ko lak 1.55-na batgipa vote-rangchi cheangahachim.
Sangma-ni parakatani gitade, mitamrang toromni bidingo aro mitamranga ong•gijagipa video-rangko niksoahani a•sel NPP-na pu•onronggipa voter-rangoni sak 50,000-mangni gitasan ia Lok Sabha election-o gipinrangna pu•onskaahachim.
Manderang gital MP-ko nangnikahani gimin NPP, manderangni namnike seokaniko ra•chaka ineba ua aganaha.
Ia election-o politics kal•anirang nangana badeangaha ine janapatengon, “Garo Hills-o mitam manderang, gong 500-ni tangkako paksamsachi Durga mite aro paksamsachi Ram Mandir-ni noksako taridapenba, NPP aro BJP dolrang tangkarangko iandake chappa ka•na siengaha indide Kristianranga iandakgipa tangkako giljao dantula on•genma ine video-ko tarie watpripaaha. Ia manderang iandake tol•pinapgipa video-rangko tariaha aro manderang kakketko ma•sijae bebera•tokaha,” ine NPP Minister aganaha.
Tura-ni MP ong•e kamko ka•anio Agatha chu•sokjaha ine matnanganiko jegalatskaengon, uni MP ong•miting ua Garo Hills-ni nanganirangko bang•en Parliament-o ku•rang on•aha indiba manderang ia chango dingtanganiko nangnike MP gitalko seokaha aro iako NPP ra•chakaia ine Sangma parakataha.
Sangma-ni aganani gitade, Khasi Hills-oba sak 50,000-mangni gita voter-rangsan gipin dolrangna pu•onaiahani gimin mikkangchi NPP bilakbapilaigen.
Tura-ni gital MP Saleng A Sangma-ba a•dokni politics-onan re•bapilani cholrang donga ine janapatengon, “Saleng, bilsi 15-na MLA ong•aha aro da•o ua MP ong•e re•angengahani gimin gital daitorangko ua nikgnok. MP ong•anio Vincent Pala aro PA Sangma sagi gitan uaba suk ong•nikjagenchimode uaba a•dokni politics-onan re•bapilainaba gnang,” ine Rakkam Sangma aganaha.
Shillong aro Tura-ni gital MP sakgninan ua an•tangni namgipa skanirangkoba on•ataha.
Na·simang ia video-koba nina man·gen:
Na·simang iakoba poraina man·gen: Jripjrip dakaigipa KL Sharma Amethio Smriti Irani-ko amchepata
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
