Tura, Dec 14: Nokrek Biosphere Reserve-ni ning•o donggipa Sakal A•duma songo Tourism department-ni Eco Resort-ko rikna gita Mongolbar salo, Meghalaya a•dokni Chief Minister Conrad K Sangma, pangchakaniko songe on•angaha aro ia pangchakaniko songe on•anganio Chief Minister-ni Adviser Thomas A Sangma, sorkarini Chief Whip Marcuise N Marak, Siju-Rongara-ni MLA Rakkam A Sangma aro West Garo Hills a•jani Deputy Commissioner Ram Singh-ba dongpae bak ra•angaha. Sakal A•duma songo Eco Resort-ko rikna gita pangchakaniko songe on•angani somoio a•dokni Chief Minister, jinmana aganprakangengon, ian India a•songni salgro salaram jolo nambatsranggipa tourist resort-rangoni damsa ong•gen aro iana gong kror 23 tangkarangko jakkalgen ine talatangenba, ia Eco Resort-ko bilsisani gisepon matchotgen ine parakangaha.A•doko tourism-ko tang•doatna aro namroroatna gita gong kror 700 tangkarangko sorkari, JICA-oniko man•soaha aro ia tangkarangoni gong kror 350-ko Khasi Hills-na aro gong kror 350-ko Garo Hills-na chamanaha ineba Chief Minister parakataha.

Meghalaya a•doko chiring chibisikrangko ripinge rakkina man•na gita bakan Water Reservoir Project-ko ra•gatgen ineba ia tom•anio Chief Minister parakataha.