Shillong, Apr 10: Salgittamna ong•atanggipa Khasirangni Shad Suk Mynsiem manianiko Sombar salo matchotataha aro ia salgittamna ong•atanggipa manianio Khasi me•a me•chikrang, kusi ong•e chrok mesaanio bakko ra•angtokaha.
Ia manianiko April 8 tariko a•bachengataha aro skanggipa salo sak 270 chrokgiparang bakko ra•angaha aro uni ja•man gnigipa sal, chong•motan April-ni 9 tarikoba sak 529 chrokgiparang bakko ra•angtokaha.
Sombar salan ia Shad Suk Mynsiem maniani bon•kamgipa sal ong•ahani gimin ia bon•kamgipa salode manderang bang•bate chrok mesaanio bakko ra•angtokaha ine Shad Suk Mynsiem-na songgipa Seng Khasi Publicity Committee-ni chairman Bantei Sing Rumnong parakataha.
Ia maniani bon•kamgipa salo, Meghalaya a•dokni Governor Phagu Chauhan, Deputy Chief Minister Prestone Tynsong, Voice of the People’s Party (VPP)-ni MLA Brightstarwell Marbaniang, gitcham MLA Samlin Malngiang aro gipin dilgiparangba bakko ra•angtokaha.
