Shillong, June 27: Meghalaya state Skills Development Society, Labour departmentni ning•o salgnini Skill Melako Jowaini Kiang Nongbah Govt. Collegeni auditoriumo ong•atangaha, jekon joltangni MLA Shri Wailadmiki Shyla, MSSDS, West Jaintia Hillsni ADC aro UKiang Nongbah Govt. Collegeni principalni dongpanio iako oprake on•angaha. Ia skill melako Skill Meghalaya Programmeni ning•o mija March jaonin ong•atenga jekon a•dokni skotong minister oprake on•angahachim ine ua Executive Director Shri Shivansh Awasthi IAS talatangaha. Ia skill Meghalayara a•dokni chadamberangna jakni changa-sapani aro an•tangtangko mikkangchi janggi tanganina tarina skiani bak ong•a. Ia program bilsi bongani ja•manode a•dokni chadamberangko sak lak 1.2 na baten skie ra•giparangko ong•katatna ka•dongsoenga ine ua aganaha.

Ia Skill Developmentchin bang•a namgnirangko chadamberangna on•na man•gnok. Kam gri dongenggipa chadamberangna dingtang dingtang a•bao dake-ka•e cha•na cholko on•a man•gnok ine Shri Wailadmiki Shyla tom•ao aganpaaha.