Guwahati, June 1: Salgro Salaram jolni a•dokrango, mongsongbate Assam aro Manipur a•dokrango, chi banna re•anichi sak 5.5 lakh mangni gita manderang neng•nikaniko man•engaha aro unbaksana, Sonibar aro Robibar salrangoba mikkarang jimbee waangkugen ine Met Department mikrakataniko on•ataha.
Sukrobar salo, a•songni Prime Minister Narendra Modi, obostarangko nirokaniko dakangaha aro Assam, Manipur, Meghalaya, Mizoram, Tripura aro West Bengal a•dokrango Remal balminduri ong•ani a•sel sianggipa nokdangni manderangna gong lakh 2 prakko Relief Fund-oniko on•a aro gong 50,000 tangkarangko saknaata man•gipa manderangna centre-oni on•a ku•rachakangaha.
Obostarangko niatgenchimode Assam a•dokode namen nambatrorojaenga ine nikna man•a. Sukrobar salo, sak 6 manderang siaha, aro iana skangba Remal balminduri baldapani a•selo sak 3 manderang siahachim, indake iako chane gimik gimang sak 10 mangni gita sianggiparang gapengaha.
Dam 11 a•jarango chong•motan, Dhemaji, Dibrugarh, Nagaon, Hailakandi, Karbi Anglong, Dima Hasao, Karimganj, Cachar, Hojai aro Golaghat a•jarango sak 3.49 lakh manderang neng•nikaniko chagrongna nangao ga•akenga. Indake, dam 187 relief camp-rangko authority-rang rike on•aha aro ia biaprango sak 28,000 manderang dongchakenga ine nikna man•a.
Manipur a•dokni Imphal East, Imphal West, Kangpokpi, Bishnupur, Noney, Churachandpur, Senapati aro Kakching a•jarango, sak 1.88 lakh mangni gita manderang, chi banna re•anichi aro a•a ruanichi neng•nikaniko man•tokenga.
Dingtang dingtang dolrang naljokatani kamrangko ka•na a•bachengataha aro sak 18,000 manderangko naljokgipa biapona rimongkatangna man•aha. Ia manderangna, dam 56 relief camp-rangko authority-rang rike on•aha.
Meghalaya a•dokoba, Bristibar pringni bako Sohra-ni Nongpriang songo a•a ruanichi, sak 2 manderangni janggirangko gimaataha aro iani gisepon sak 2 manderangni bimangrangko nikkujaengachim, indake ong•genchimoba, am•sandianiko dakenggipa naljokatgipa dolrang dondikpilgija uamangko am•sandianiko dakengkua.
Mizoram a•dokoba, Mongolbar salo a•a rudapa man•e gimaenggipa manderangni bimangko am•sandianiko dakengkua.
Na·simang ia video-koba nina man·gen:
Na·simang iakoba poraina man·gen: Assam-o chi bana re•anio lakh 3.4 manderang nangchakea, sak 8 sia
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.com/@NortheastMediaHub2020
Instagram- https://www.instagram.com/ne_media_hub
