Shillong, Oct 4: Salgro salaram a•dokrango namroro silroroani gride India a•song namroro silroroanio chu•sokgipa ong•ja ine Sombar salo, Shillong-oni Dawki-ona km 64.21 ong•gipa NH-40 ramako tarina aro Dawki dolongko rikna gita pangchakaniko songe on•angani somoio India a•songni Vice President M Venkaiah Naidu parakataha.

A•songni Vice President, salgittamna salgro salaram jolona re•baaha aro ua Sombar salo, Meghalaya a•dokni skotong Shillong songjinmaona sokbaahachim. Ua Mongolbar pringo Guwahati-ona re•angskanaba gnang.

Ia ramako tarina gita pangchakaniko songe on•angani somoio a•songni Vice President, jinmana aganprakangkuengon, salgro salaram a•dokrango namroro silroroaniko ra•bana gita ma•mong sorkarini chame on•atenggipa tangka paisarangchi kakketo kamrangko ka•china didiangaha.

“Salgro salaram a•dokrango an•ching pilak kamrangkon maming jakkalsretani gri ta•rake ka•genchimode salgro salaram a•dokrangan a•songo namroro silroroaniko ta•rakbatatna man•gen,” ine Naidu aganaha.

Salgro salaram a•dokrango rama jal•langrangko namdapatna nangengani gimin aganangengon, rama jal•langrang namgenchimode pilakni gitan namroro silroroani sokbaaigen ine Vice President aganaha.

Salgro salaram a•dokrango da•o bobil dake chakatanirang komiangahani gimin da•o ian namroro silroroaniko ta•rakbatatani somoi ong•engaha ineba Naidu aganaha.

Salgro salaram a•dokrango a•brirara dakani gimin aro mikkarang warongani gimin rama jal•langrangko tarianio neng•nikanirangko chagrongna nangronga ine janapatengon, a•briarigipa biapo ramarangko tarina gita dingtang cholrangko sandiskachina gita Vice President didiangaha.

Meghalaya a•doko Tourism-ni kamrangko tang•doatna gita NH-40 ramako taridapna nangengani giminba Naidu aganangaha.

Meghalaya a•dokko nitobegipa aro dingtang dingtang cholrang donggipa biap ine aganangengon, a•doko Tourism-ko tang•doatna aro gipin biaprangoni re•baenggipa manderangna dongchakanirangko namdapatna gita kamko ka•china ua, a•dok aro ma•mong sorkarirangko didiangaha.

Meghalaya a•doko Tourism-ko tang•doatna kam ka•anio samtangtango ong•telaigiparangna maming nangchakeaniko ra•bajachina gitaba ua didiangaha.

Meghalaya a•dok gita dakgipa biaprango gama ge•ani aro bading chiwalani kamrango nangrimaniko nangchongmota ine janapangengon, a•doko me•su samjakrangko bang•a manderangan ge•na gisiko nangtokani gimin ian bading chiwalani kamrango gisik nanggipa manderangna cholrang gita ong•skaenga ine Naidu parakataha.

Meghalaya a•doko bading chiwalanirangko dake cha•china chadamberangko didina gita PRIME Hub-ko a•bachengatahani gimin ua dingtangmancha Meghalaya sorkariko mittelpilangjolaha.

Meghalaya a•doko Lakadong holdi aro e•chingrangni mingsing minggamengani gimin toe aganangengon, iandakgipa cholrangko ra•e a•dokni gam-jinrangko a•gilsakna mesokchina gita Naidu, a•dokni manderangko didiangaha.

Meghalaya a•doko skanggipa Tribal me•chik Chief Secretary ong•ahani gimin ia tom•anio a•songni Vice President, dingtangmancha Rebecca Vanessa Suchiang-naba an•tangni kusi ong•chakaniko parakangaha aro uni chu•sokgipa ong•anian Meghalaya a•dokni chadamberangko didiani gita ong•skagen ine aganaha.