New Delhi, June 1: India a·songo COVID-19-ni tikarangko bang·bate tarina nangenga ine dingtang dingtang dolrang agantokengani gimin July jaode salprako kror 1 manderangko tika su·na gita chu·ongen tikarangko man·gnok ine ICMR-ni dilgipa parakataha. Bang·bata a·dokrangon tikarang chu·ongjaengani gimin badi ka·tokahachim aro mitam a·dokrangde tikarangko joljol man·bana gita a·gilsakni gipin a·songrang baksa tender-rangko on·pilengachim.
Indake ong·engon, July jaode ba August a·bachengachibarade salantian krorsa manderangko tika su·na gita India a·songo chu·onga gitan COVID tikarangko man·gnok ine Mongolbar salo Indian Council of Medical Research (ICMR) parakataha.
India a·songo chu·onga gitan donga ineba ICMR-ni dilgipa Balram Bhargava, kobor ra·timgiparangna parakataha.
“July ba August jaode an·ching salprako krorsa manderangko tika su·na gita chu·ongen tikarangko man·gnok aro December jani gisepode a·songo songdongenggipa pilak manderangkon tika su·na gita chinga ka·dongenga,” ine Bhargava parakataha.
Lockdown gita dake champengatanirangko ka·sinsin ra·galatgenchimoba COVID-19 rang·san gipjawa indiba manderang COVID-ni tikako su·e ra·na nangchongmota ineba ICMR-ni dilgipa aganaha.
“Lockdown-rangko ra·galatanichi COVID gipjawa indiba an·ching pilakan tikako su·e ra·chongmotna nangenga. Tika su·ani 70 percent batna nangenga aro an·ching pilakan COVID-ni niamrangko ja·rikna nangenga,” ine Bhargava aganaha.
