Shillong, July 9: Nagaland a·dokni A·chik chadambe sakgni, Samuel Sangma aro Rose Sangma-ni Haryana aro Delhi-o siangaoni antignini ja·man, ia chadambe sakgnini siani a·selrangko am·sandichina gita Meghalaya a·dokni Chief Minister Conrad K Sangma, Delhi-ni Chief Minister Arvind Kejriwal aro Haryana a·dokni Chief Minister ML Khattar-na sedoataha.
Ong·na kragija obostao sianggipa A·chik chadambe sakgnina kakket bichalko on·na man·na gita ua rake kamrangko ka·gen ine re·anggipa June-ni 30 tarikosan Meghalaya a·dokni Chief Minister Conrad K Sangma, Samuel Sangma-ni nokdangna ku·rachakaniko on·atenba, ia a·selni bidingo FIR-ko ka·china sianggipa chadambe sakgnini nokdangrangkon didiatahachim.
Indake ong·engon, re·anggipa July-ni 5 tariko ua Nagaland Garo Tribal Council-ni seatgipa chittiko man·soaha aro ia council-ni seatgipa chittio pangchake ua Delhi aro Haryana a·dokni CM-rangna chittiko seataha ine Chief Minister Conrad Sangma parakataha.
Dimapur-oni chadambe sakgni, ong·na kragija obostao siangani ja·man salgro salaram jol gimikon ia a·selko jegalgrimtokengachim aro ia a·selni bidingo jakgitele am·sandianirangko dakchina dabitokengachim.
