Shillong, March 06: Adita salna skang matchotanggipa Santosh Trophy-na robol kal·susaatgipao bakko ra·e final-o on·tisani pal gita ama cha·ani ja·man silver medal-ko cheenba a·dokna mikkim-rasongko ra·bagipa Meghalaya Football Team-ko Sombar salo, Shillong, Mawlai Petrol Pump-o Khasi Students’ Union (KSU) aro Federation of Khasi Jaiñtia and Garo people (FKJGP) dolrang mande ra·bee rimchaksotokaha.
Meghalaya a·dokko man·aoni Meghalaya Football Team robol ga·tingsusaatanio namen mingsinggipa Santosh Trophy–ni final round-ona ianpako skanggipa chang ong·e sokdoangahachim. Indake ong·oba, re·anggipa anti bon·achibara Sonibar salo, Saudi Arabia-ni Riyadh-o final-ko kal·susaanggipao Meghalaya team, dolgipin mikkangchakgipa Karnataka baksa 2-3 golrangchi rasong gribee ama cha·baaha.
Iana skangrango Meghalaya football team, Santosh Trophy-o bang·bata changon nambee aro chu·soke kal·na gita cholrangko man·ahaoba final round-ona sokdona gita man·rongjachim. Uandake, Karnataka football team-ba iana skang 1975-76 bilsio runners-up-onasan chu·sokna man·aiaha, indiba Meghalaya-nade ian final-ona skanggipa chang ong·e sokdoangani ong·achim.
“Ia kal·susaanio bakko ra·anio, kal·egipa chasong damberang bang·en skie ra·na gita cholko man·aha, maina gimikan chadamberang ong·ani gimin re·baenggipa changode da·ona baten nambate tarisamsona gita man·gnok ine kal·gipa dolni coach Khlain Pyrkhat Syiemlieh koborna aganangaha.
Ia 2023 bilsini Santosh Trophy-ni final-o, Bangalore Super Division League-o kal·giparang bang·batan Karnataka dolchipak kal·aha, uandake, Meghalaya-chipakara Shillong Premier League-o kal·giparang bang·batan kal·tokskaaha.
“Ia bilsinade chinga skangrangona baten nambate tarisoahachim, indiba chingchipak kal·gipa agittal kal·giparangming nisusaatode gipin a·dokrangna kal·giparang bang·aan sapgiminrangsa ong·a ineba Khlain agandapataha.
A·dokni chadamberangko robolna gisiko nangchina gita didiangengon, football ian kal·susaani mangmangsan ong·aija, janggi tangna cholko dake ra·ani minggipin chol gitaba ong·aha indiba iano on·kangani, gisiko nangani aro bewalrangko rakkiani dongna gita nanga ineba Khlain parakataha.
