Damas, April 3: A·chik a·songni manderang, da·o sasono ong·enggipa dolko seoke cheatgenchimode sokbaengipa sal-somoirango GHADC-o pangkamani donggen ine Meghalaya a·dokni skotong minister aro NPP dolni padot Pa Conrad K. Sangma, Sonibar salo manderangna ku·rachakangaha.
GHADC-o da·o Deputy CEM-ni kamko jako ra·enggipa aro NPP-ni candidate Dolly Sangma-na a·jani manderangni chu·gimik chakpaaniko am·na gita, North Garo Hills-ni Damas constituency-ni ning·ogipa Keragalram songo eleksinna tom·aniko ong·atgipao aganprakanganio, “GHADC-na dingtangmancha gisik on·aniko nangchongmotenga, maina council-ni obostarang da·o namen namjabegipao ga·akenga aro ma·mong aro a·dok sorkarini dakchakaniko uamang nangenga. Uni gimin a·doko sasonni bilko jako ra·enggipa dolna cholko on·ani namen nangchongmotgipa ong·enga…jedakode ong·siangenggipa GHADC-na sorkari dakchakanirangko on·e nirokatna man·gen,” ine Pa Sangma parakangaha.
Manderangni giminan NPP dol on·kange kamko ka·enga aro uamangna nambata janggi tangani cholrangko on·na aro jakkaltogipa dingtang dingtang cholrangko on·na gita kingkot kamrangko ka·enga ineba ua agankuaha.
A·jao songdongkamgipa tribal ba a·bri jolni manderangni niam-reti aro dakbewal-rikbewalrangko ripinganio council-ara namen gamchatgipa ong·a aro council-ko bilakdapatna aro bil gnangdapatna gita nangchongmota ine aganenba, “Council-ko gital dake rikpiltaina chingni mangsonganirang gnang aro council-ni pangkamaniko chinga nangnika. Kam ka·giparangna, uamangna bil on·gimin kamtangtangko ka·china gita chinga council-ko mikkangchi nambate chalaiangna gita ku·rachakaniko on·enga,” ineba skotong minister agandapaha.
Salni tom·anio manderangko ka·dingatjole, NPP dolna uamangni gamchatgipa vote-rangko pu·ontokpabo ine manderangna memorandum-ko on·achi, a·jana pilak namroro-silroroaniko ra·bana aro nambata rama-jal·angrangko on·na kamrangko ka·na gita sorkarina cholko on·china ua tom·bagiparango mol·molangjolaha.
