Shillong, Sept 22: Saubhagya Scheme-ko jakkalsreta ine matnanganirangko jagittamni gisepon am•sandie, jinmana parakchina gita Meghalaya a•dokni BJP dol, MDA sorkariko didiangaha.
Meghalaya a•doko BJP dolba, NPP-chi dilenggipa MDA sorkarini bak ong•paengachim ine nikna man•a.
Indake ong•engon, adita salrangna skang MDA-ni tom•anio ua iani bidingo bang•en sorkario sing•doaha aro Chief Minister an•tangan, iani bidingo inquiry committee-ko songna ku•rachakaha ine Chief Minister-ni advisor aro BJP-ni state president Ernest Mawrie parakataha.
“Saubhagya Scheme-ni bidingo inquiry-ko jagittamni gisepon matchotate jinmana parakchina gita anga sorkariko aganaha,” ine Mawrie parakataha.
Saubhagya scheme-ko jakkalsreta ine matnanganirang ong•katahani gimin iani bidingo CBI-chi inquiry-ko dakchina dabitokani ja•man sorkari, jakgitelgipa inquiry committee-ko songna ku•rachakahachim.
Ia inquiry-ni report-na BJP sengkugen indiba ia inquiry dakaniko uamang chu•ongnikjagenchimode CBI-chi inquiry-ko dakchina dabianggen ineba BJP-ni state president parakataha.
Meghalaya a•doko tangka jakkalsretani ba kamrangko ka•anio ong•gija dakanirangko BJP dol name nirikkienga aro banoba ong•gija dakanirang donggenchimode ku•rangko on•angkugen ineba Mawrie parakataha.
“Tangka jakkalsretanirango chinga maming dakeba jrip nie donggiparang ong•jawa aro mikkangchiba iandakgipa kamrangni giminn ku•rangko on•angkugen,” ine ua aganaha.
Saubhagya Scheme-ko Meghalaya a•doko jako ra•e ka•aniko Comptroller & Audit General (CAG)-ni am•sandianio gong kror 149 tangkarangko gimaataha ine ma•sina man•ahachim.
CAG-ni report-o parakani gitade, ia Saubhagya Scheme-ko a•dokni Power department, Delhi-ni company-na on•anichi gong kror 149.12 tangkarangko noksan ong•atahachim.
