Guwahati, Nov 19: Assam, Guwahati-oni saksa Class IX-o poraienggipa chatri, a·song gimikni school curriculum-o an·tangtangko chelchakani bidingo indin skie on·anirangko man·chapatchina gita a·songni Prime Minister Pa Narendra Modi-o mol·molenba chittiko seataha.

Guwahati, Boraigaon-ni Pragjyotish Senior Secondary School-oni chatro, jekon Minakshi Singha ine ma·sina man·aha aro jean Wushu player saksa ong·a ua, Prime Minister-na mija Butbar salo Speed post gita chittiko watataha.

PM-na chittiko seatgipao, a·songo da·ororo me·chikrangni kosako chadrapanirang aro ong·gija dakanirang batorobaengon, me·chikrang jedakode an·tangtangko chelchakna ka·donggipa ong·gen, uana a·songni pilak skulrangon an·tangtangko chelchakani bidingo indin skie on·anirangko school curriculum-o chapatpachina gita anga nang·o dingtangmancha mol·molna sika, ine bilsi 15-ong·gipa me·chik chatro janapataha.

Minakshi, an·tangba Guwahati-ni Maligaon jolo mija bilsionin una skie on·aniko dakenggipa (master) Sifu Gopi Singh-ni nirokatani ning·o Robibar changantian me·chikrangna an·tangtangko chelchakani bidingo skie on·anirangkoba dakbaenga.