Shillong, Feb 1: Mongolbar salo, Shillong songjinmani Additional Secretariat Building-o donggipa Myntdu Building-o Secretariat Health Clinic-ko Meghalaya a•dokni Secretariat Administration Department (SAD)-ni Minister Renikton L Tongkhar-ni jakchi nokdonggae on•angaha. Ia Secretariat Health Clinic-ko nokdonggae on•angani somoio SAD Minister, jinmana aganprakangengon, ian Meghalaya Secretariat-na gisik ra•beani sal ong•aha ine parakangaha.

Mandeni janggi tanganio an•seng baljoke donganiko nangchongmota ine janapangengon, kam ka•chakgipa biaprangoba officer-rangna aro office-o kam ka•gipa gipin manderangna iandake sanne bane on•ani cholrangko nangchongmota ine Tongkhar parakataha.

Ia health clinic-ko kulianichi nanggitikan somoirango manderangna bang•a dakchakani ong•gen ineba ua an•tangni ka•dongchakaniko parakangaha.

Ia Secretariat Health Clinic-ko nokdonggae on•anganio dongpae jinmana aganprakanggipa gipin manderangara, SAD-ni Commissioner & Secretary MN Nampui aro SAD-ni Secretary VR Syiem ong•a.