Shillong, July 27: Shillong songjinmani Main Secretariat mikkango, asonge jingjengatengani gimin Mongolbar salo Meghalaya a·dokni Chief Minister Conrad K Sangma, Thma U Rangli-Juki-ni dilgipa Angela Rangad-ni kamko jegalataha.
A·doko hajira ka·e cha·enggiparangna sorkarini ku·chakgimin tangka paisarangko on·jaenga ine matnangenba Rangad, Secretariat mikkango asonge jingjengatengachim ine nikna man·a.
Indake ong·engon, sorkarini ku·rachakgimin scheme-na gimik sak 2,20,000 manderang dorgasto galaha indiba dorgasto galgipa manderangni bimingrangko NIC aro Labour department, name nipiltaion, indita sak manderangoni komibeoba 35,000 ba 40,000-mangde tol·e segimin bimingrangsa ong·ani gimin den·galna nangaha aro bimingrangko den·galon sak 1,84,000-ona komiangaha ine Chief Minister talatangenba, ia sak 1,84,000-oni sak 1,50,000 manderangde sorkarini on·gipa tangka paisarangko man·soaha ine parakataha.
Maikoba ma·sidapna nanganirang donggenchimode ua re·bae agangrikena ba sing·sandiena man·achim indiba Secretariat mikkango iandake asonge jingjengataniara kraani ong·ja ineba Sangma parakataha.
