Tura, April 19: Gital seokako man·gipa sak 29 MDC-rang, West Garo Hills a·jani Deputy Commissioner Pa Ram Singh-ni mikkango Garo Hills Autonomous District Council (GHADC) hall, Tura-o Sombar salo ku·mikchetangaha.
Ru·utgija salrangna skang matchotanggipa GHADC eleksino Garo Hills-ni dam 29 elakarango susae seokako man·gipa gital MDC-rang — Congress-ni sak 12, NPP-ni sak 11, Independent sak 3, BJP-ni sak 2 aro GNC-ni sak 1, a·dokni Governor Pa Satyapal Malik-ni ge·eta gita Sombar pring 11 bajimango India a·songni niam-bidiko pangchake, a·song aro jatna kim·kim ong·e Isolni bimingo kakket aro bebeo kamrangko ka·anggen ine ku·mikchetangtokaha.
GHADC-o gital Executive Committee (EC)ko rike council-ko chalaina gita Garo Hills Democratic Coalition (GHDC)-ko songe, re·anggipa Sonibar salo sak 11 MDC-rang baksa sak 3 Independent MDC-rang aro saksa GNC-MDC bakrime gimik sak 15 gital MDC-rang Meghalaya a·dokni Skotong Minister, Pa Conrad Sangma baksa a·dokni Governor, Pa Satyapal Malik-ko grongeahachim.
Indake, NPP-chi re·dilenggipa gital EC-ko rikna, Governor-ni ge·etani gita re·baenggipa April 21 tarik Butbar salo GHADC-ni gital Chairman-ko seokna eleksinko ong·atanggen ine WGH-ni DC Pa Ram Singh koborna parakataha.
