Baghmara, June 1: South Garo Hills a·jani mitam office-rango officer-rang aro gipin kam ka·giparang, office-rangchi re·a tik ong·jaengani gimin jolo songdongenggipa manderangni namgnina nambate kamrangko ka·china aro somoi gita office-rangchi re·china Baghmara-ni MLA Kartush R Marak didiataha.

Koborko on·ani gitade, adita salrangna skang Baghmara-ni MLA, Water Resources office-ona re·ange nion, office-o kam ka·enggipa officer saksa, kam join ka·chengaonin changsaba office re·angkujaenga ine ma·sina man·ahani gimin ia office-osan ong·aigija South Garo Hills a·jani pilak office-rangon kam ka·giparangko, somoi gita office-rangchi re·china aro nambate kamrangko ka·china didiataha.

Ja·mano ua South Garo Hills a·jani ADC, DTO, BDO, BADO aro uandakgipa officer-rangkoba gronge, dingtang dingtang kamrangni bidingo sing·sandie ra·angaha ineba kobor on·timgiparang u·iataha.

Uasan ong·aigija ua Mondolini dilgiparang aro dingtang dingtang NGO-rangkoba gronge agangrikangaha ine kobor on·aha.