Tura, Feb 5: Re•anggipa Mongolbar salo South Garo Hills a•jao gimagipa Assam a•dokni gue badinggipa mande saksa, da•al Sukrobar salo an•tangko rim•gittanggipa manderangoni jokbae Baghmara-ona sokbaaha ine police-rang kobor on•aha.
Police-rangni u•iatani gitade, Mongolbar salo ia mandeni gue brena gita South Garo Hills a•jani song damsaona re•angani somoio uko ma•sina man•gijagipa manderang rim•gittangenba, Rongara jolni song damsao rim•e donahachim indiba ua da•al Sukrobar pringo, an•tangko rim•gipa manderangoni joke katbae ja•mano Baghmara-ona sokbaaha.
“Da•o ia mande chingni ning•on naljoke dongenga aro chinga bakan uko uni nokdangona sokatgnok,” ine South Garo Hills a•jani SP Priyanshu Pandey, Sukrobar attamo parakataha.
Assam a•doko donggipa South Salmara a•jani Mankachar jolo gue badinge cha•enggipa Nur Muhammad, re•anggipa Mongolbar salo Baghmara-oni Karukol jolchipakna gue brena re•angengmiting somoio an•tangni Mahindra Pik-up gari baksa gimaahachim ine nikna man•a.
Indake ong•engon, ia mandeni gimaani ja•man South Garo Hills a•jani police-rang, ia mandeko sandiroroe ja•mano ia mandeko rim•gittanggipa dolni mande sakgniko rim•na man•aha aro ja•mano ia mande, an•tangko rim•gittanggipa manderangoni jokbapilna man•aha ine South Garo Hills a•jani SP parakataha.
Dos dakgipa manderangoni saksako police-rang, South West Garo Hills a•jani Ampati joloni rim•na man•aha aro sakgipinko Rongara joloniko rim•skaaha ineba SP parakataha.
