Shillong, Nov 5: Batanggimin bilsi gittam atana MDA sorkariko chalaianio uni sorkari, dingtang dingtang self help group (SHG)-rango bak ra•enggipa manderangni janggi tangani gadangko namdapatna gita gong kror 124 tangkarangko on•manaha ine Sukrobar salo, Meghalaya a•dokni Chief Minister Conrad K Sangma parakataha.
Chief Minister-ni aganani gitade, 2018 bilsina skang National Rural Livelihood Mission-ni loan-ko bilsi 10-ni gisepo SHG-rangna gong kror 35-kosan on•engkuachim indiba MDA sorkari, batanggimin bilsi gittam atani gisepo iako gong kror 124-ona bariataha.
West Jaintia Hills a•jani Thadlaskein-o SHG-rangni Mela-ko ong•atani somoio ia kattarangko Chief Minister, jinmana aganangaha.
Gitcham scheme-rangni namgnirangko manderang man•china gita MDA sorkari, ia scheme-rangko gital daktaie manderangona sokatna kam ka•enga ineba ia tom•anio Chief Minister aganaha.
Ia SHG mela-ko ong•atanio Jowai-ni MLA Wailadmiki Shylla, NRLM-ni kamko ka•na gita sorkari baksa nangrime kam ka•enggipa Meghalaya Rural Bank (MRB)-ni on•enggipa gong lak 82-ni loan-rangko, dol 82 SHG-rangna on•angaha.
Iana agreba, gong lak 56.5 ong•gipa Community Investment Fund-ko dol 11 Village Organisation (VO)-rangna aro gong lak 15-ni Vulnerability Reduction Fund-koba dol 15 VO-rangna ia tom•anio on•angjolaha.
Meghalaya a•doko game ge•e cha•enggiparangko dakchakna sorkarini ra•gatgipa Farmers Collectivisation for Upscaling Marketing Systems (FOCUS) program-ni ning•o gong lak 29.90-ni cheque-rangkoba ia tom•anio Chief Minister-ni jakchi, West Jaintia Hills a•jani dol 46 Producers Group-rangna on•angaha.
Ia Mela-ko ong•atanio dingtang dingtang SHG-rangni stall-rangkoba Chief Minister niangjolaha.
