Shillong, June 17: Sajinmani a·sel ru·uta salrangoni chipchange dona man·enggipa Shillong songjinmani dal·batgipa bajar-anti cha·ram Iewduh ba Bara Bazar-ko kulipiltaina salsa skang, sajinmani tikako su·angtokchina gita, dokan nokgiparang aro ramasamrango pal-badinggiparangko district administration aro jolni Nokma ba Rangbah Shnong didiangaha.
Bara bazar-o dokan dakgiparangna dokan dake cha·na cholko on·piltaina gita miksonge salgnina kingking sajinmani tikako ua biapo su·angaha.
Skanggipa salon, dokan dake cha·giparang an·tangtango tikako su·na bang·en re·batokaha aro biapo agre mande tom·dakjachina gita slot-rangna chinga coupon-rangko on·aha ine Myntri M Kharlukhi, koborna agan-talataha.
Butbar salo gimik sak 245 manderang tikako su·angtokaha aro gnigipa salonaba sak 250 manderangna coupon-rangko on·angaha indiba Bristibar salo badita sak mancha su·angahachim, chu·gimikko hisape nia dongkuja ine talatenba, tikako su·na gita chinga darangkoba draja indiba iako su·e ra·china gita manderangko didiasan ong·aia ine Kharlukhi parakatkuaha.
Unomiting, tika su·ani ja·man observation room-o asonge sengenggipa saksa dokan nokgipa Upender-ni aganani gita, an·tangko aro sakgipinko naljokatna gita ua ia tikako su·aha ine aganenba, chipchangatani a·sel neng·nikaniko chagrongengani gimin bading-chiwalaniko dakpiltaina man·na gita an·tango tikako su·e ra·aha ineba ua agandapaha.
Indake ong·engon, songjinmani mongsongbatgipa anti cha·ram Iewduh-o dokanrangko kuliatpiltaiani bidingo District Administration baksana Hima Mylliem-ni skotong dilgipa aro KHADC-ni CEM-mangni gisepo chanchirimangaha. Indake, Sukrobar salo 15 percent dokanrangko kulina on·na gita DC tik ka·angaha.
Gimik dokan donggipa ge 5000-rangoni ge 1,222 dokanrangkosan kulina gita on·enga. Salprako ge 185 dokanrangko kulina on·an baksana, ramasamo pal-badinggipa ge 184 dokanrangkoba kulina gita cholko on·enga.
