Shillong, Sept 4: Shillong-oni Dawki-ona km 64.21 ong•gipa NH-40 ramako tarina aro Dawki dolongko rikna gita Sombar salo India a•songni Vice President M Venkaiah Naidu, pangchakaniko songe on•angaha.

Ia ramako tarina pangchakaniko songe on•angani somoio a•songni Vice President, jinmana aganprakangengon, ia chasong gitalo rama jal•langrangko man•anian namroro silroroaniko ra•baani gita ong•a ine parakangaha. Ramarangko tarianio kakketo aro dongnuani gri chu•sokatna nangani giminba ua aganangaha.“Ramarangko mai dakgipa bosturangchi tarienga uarangko manderang ma•sina nanga aro ramako tarienggipa manderangba kakketo kamko ka•na nanga,” ine Naidu aganaha.

Ia ramana pangchakaniko songanio Meghalaya a•dokni Chief Minister Conrad K Sangma-ba jinmana aganprakengon, ia ramara a•dokna namen nangchongmotgipa ong•a aro ia ramako tarianichi Shillong-oni dingtang dingtang biaprangona songreani somoiko bakkandikatasan ong•aigija a•dokna namroro silroroaniko ra•baaniba ong•gen ine parakangaha.

Ia Shillong-Dawki ramara East Khasi Hills, West Khasi Hills aro South West Khasi Hills a•jani dingtang dingtang songrangko a•dokni skotong Shillong songjinmaona nangdimeatgipa rama ong•a aro ia ramako tarina gita gong kror 1606 tangkarangko chamsoenga. Ia ramako 2022 bilsini December jao matchotatna gita ka•dongsoenga.

Ia ramara Dawki Integrated Check Post-oni Bangladesh a•songni Tamabil-o nangdimegipa rama ong•ani gimin da•o ia ramako taridapanichi Meghalaya a•dokni aro mongsongbate East Khasi Hills a•jani Bangladesh a•song baksa bading chiwalgrikani kamrangko altubatatgnok.

Ia ramako tarina gita Road Transport & Highways Ministry, National Highways & Infrastructure Development Finance Corporation Limited (NHIDCL) aro Japan International Cooperation Agency (JICA) baksana Meghalaya sorkari nangrime tangka paisarangko on•enga.

Indake ong•engon, Meghalaya a•dokara a•briarigipa biap ong•ani gimin a•doko namroro silroroaniko ra•bana gita rama jal•langrangko namen nangchongmota ineba a•dokni Chief Minister Sangma aganaha.

Meghalaya a•doko ramarang Sq Km ritchaprako km 48-san ong•engani gimin a•songni gita Km 180 ong•enggipana namen komibatenga aro Meghalaya a•doko mikkarang warongani a•sel aro biaprang ga•nangjani a•sel tarigimin ramarangko name rakkianioba ra•bianirangko chagrongna nangenga.

Dingtang dingtang ra•biani aro neng•nikanirangko chagrongna nangengoba a•doko rama jal•langrangko namen nangchongmota ine nikenba a•dok sorkari, National Highway-rangkosan ong•aigija pilak rama jal•langrangkon tarie on•enga aro uandaken game ge•e cha•giparangna an•tangtangni bosturangko bazar antirangona sokatna, me•chikrangna an•seng baljokaniko on•na aro chadamberangna bida budiko on•na cholrangko on•enga ine Sangma aganaha.

Chief Minister-ni aganani gitade, Ranikor-Maheshkola-Baghmara rama aro Tura-Dalu ramako man•chape dingtang dingtang NH project-rangkoba sorkari jako ra•e ka•engaha aro una agreba mikkang ja aro bilsirango tarina gita km 47 ong•gipa ramarangnaba da•o DPR-ko tariengaha.

National Highway ramarangna agreba songadam nokadamrango Pradhan Mantri Gram Sadak Yojana (PMGSY) ramarangko tarianioba India sorkari, Meghalaya a•dokna dakchake on•enga ine Chief Minister aganaha.

“Chinga ming 648 rama tariani kamrangchi km 2728 ramarangko tarimanaha aro dam 38 dolongrangkoba tarimanaha. Ia 2021-22 bilsini gisepo chinga km 1845 ramarangko matchotatna nisanko donenga. Ia pilak ramarangko chinga re•baenggipa March jani gisepon matchotatgen ine India sorkarina ku•rachakaniko on•enga,” ine Sangma aganaha.

Meghalaya a•doko rama jal•langrangko tarina gita ma•mongni Central Road Fund Scheme-koba man•enga ineba Chief Minister parakataha.