Shillong, Apr 14: Shillong songjinmani mongsonggipa chiring chibisikrang, chong•motan Wahumkhrah, Wah Umshyrpi aro Wah Umkhen-ko tangatpiltaiani bidingo jinma chanchirimna gita Sukrobar salo dingtangmancha tom•aniko, Shillong songjinmani Yojana Bhawan-o ong•atangaha aro ia tom•anio Meghalaya a•dokni Chief Minister Conrad K Sangma, Deputy Chief Minister Sniawbhalang Dhar, Minister AL Hek, Chief Secretary D P Wahlang, sorkari officer-rang, dingtang dingtang Dorbar Shnong-ni membor-rang aro dingtang dingtang dolni membor-rangba dongpae bakko ra•angaha.
Ia tom•aniko ong•atani bidingo a•dokni Chief Minister Conrad K Sangma, tom•anio bak ra•giparangna agan-talate on•angengon, Shillong songjinmani mongsongbatgipa dilgittam chiring chibisikrangko tangatpiltaiani bidingo jinma apsan chanchirimna gita ia tom•aniko ong•ataha ine an•tangtangni gamchatgipa ku•pattianirangko on•giltokchina dingtang dingtang Dorbar Shnong-rangko aro jolo songdongenggipa manderangko didiangaha.
A•doko namroro silroroanina kamrangko ka•engon, samtangtango ong•telaigiparangko chel•chakna aro ripingna sorkarini miksonganirangko jinmana talate on•na gitaba ia tom•aniko ong•ataha ine Chief Minister parakataha.
A•gilsako ding•a aro sin•anirang batroroenganiko champengna gita sorkarini ka•enggipa dingtang dingtang kamrangni giminba ia tom•anio Chief Minister agan-talate on•angaha.
Ia tom•anio a•dokni Chief Secretary DP Wahlang-ba jinmana aganprakengon, chiring chibisikrangni moila ong•aniko champengna NGT aro kacharirangba dingtangmancha ge•etanirangko on•manaha ine janapatenba, a•songo mitchibatsranggipa dil 45 chiringrangko NGT-ni segatanio Shillong songjinmani Wahumkhrah aro Umshyrpi chiringrangba damgni ong•paenga ine parakataha.
