Shillong, Jan 4: Da·al Sombar salni bako, Youth Affairs & Sports-ni Union Minister of State Kiren Rijiju, Shillong songjinmani Laitkor-o donggipa Assam Rifles Public School (ARPS)-ni Khelo India Sports (Sports School) baksana Shillong songjinmani Sports Authority of India (SAI) Training Centre-o Synthetic Athletic Track & Field aro Synthetic Football Ground-ko a·bachengate on·angaha.
Ia kal·chakram biaprango a·bachengate on·angani somoio Youth Affairs & Sports-ni Union Minister of State, jinmana aganprakangengon, Shillong songjinmani NEHU campus-o donggipa SAI training centre-ko centre of excellence aro ‘high altitude training centre’ ong·atna nangnikenga ine parakangaha.
Ia centre-ko nambatsranggipa SAI training centre ong·ate ua chubata gadango skie on·chakgipa biap ong·atna kam ka·gen ineba Rijiju parakataha.
“Ia biap chuanio indita ong·janaba gnang indiba ia biapko high altitude training centre ine mingna chuani chu·onga,” ine ua aganaha.
“Ia biapni chuani feet 5000 ba una bang·gija kominaba gnang indiba ia biapara namen kragipa ong·a aro ia biapko training centre dakkamna man·gen,” ineba Rijiju parakataha.
Union Minister-ni parakatani gitade, India a·songo high altitude ba chugipa centre-rang bang·gijasan dongaiani gimin ua Meghalaya, Arunchal Pradesh ba Aizawl-o kulidapna nangnikenga.
Laitkor-o donggipa Assam Rifles Public School-ni Khelo India Sports (Sports School)-ni gimin aganangskaengon, ian mikkangchi chegiparangko ong·katatgipa skul gita ong·anggen ine Rijiju parakataha.
Ia ARPS school-ko a·songo kal·susaanirangko tang·doatna gita ra·gatgipa Khelo India-ni ning·o residential sports school dake kuliskaaha aro ia sports school-ko kulina gita SAI aro ARPS-ni gisepo soi ka·grikahachim.
India a·songo kal·susaanirangko bang·e dal·e ra·tokja ine janapatengon, songsalni iandakgipa chanchianiko aro sorkarini kam ka·aniko dingtangatna gita nangenga ine Youth Affairs & Sports-ni Union Minister of State parakataha.
Changgipa sapgiparangko aro kal·susaanirango chegiparangko nama bewalo ong·katatna nangenga ine janapatengon, a·songo bang·gija changgipa sapgiparangkosan sandie uamangna namgipa skie on·aniko on·na man·enga aro uamang chu·sokgipa ong·angenga ine Rijiju parakataha.
Olympics-rango medal-rangko komibate man·engani gimin an·tangni suk ong·gijaniko parakatengon, 2028 bilsio Los Angeles songjinmao ong·atna sienggipa Olympics-o India a·songba medal man·batsranggipa dam 10 a·songrangoni damsa ong·pachina gita miksonganiosa Sports Ministry rake kamrangko ka·enga ine Rijiju parakataha.
India a·songo kal·susaanirangko nambatatna gita pilakkon an·tangtangni man·a gita on·gilchinaba ua didiangaha.
