Shillong, Aug 11: Mongolbar salo Shillong songjinmani Laitumkhrah-o IED bomako gopretani ja•man songjinmani mongsonggipa biapo iandake boma gopretgen ine maming chanchisoa dongjachim aro ian sorkariko mikrakatani gita ong•aha ine Budbar salo a•dokni Home Minister Lahkmen Rymbui parakataha.
Ia bomako gopretanio jak donggipa manderangni kosako jegalatengon, ian intelligence-ni chu•gimik chu•sokgijaniko mesokanide ong•ja indiba kamo olgrokaniko mesokani gita ong•aha ine Home Minister parakataha.
“Ia biapo indakgipa a•sel ong•gen ine chingo maming chanchisoa dongjachim aro ian chingna mikrakatani gita ong•aha. Batanggimin somoirango boma gopretanirangkoba police-rang nie mikrakbate kamko ka•na nanggen aro maiba koborrangko man•genchimoba chongipasan ine mikchepna nangjawa,” ine Rymbui aganaha.
Mikkangchi iandakgipa a•selrangko champengsona gita sorkari, obostarangko nie name ja•kuko de•na nanggen ineba ua aganaha.
Joltangtango chanchichipna kragipa manderangni re•ruraanirangko ba maiba kamrangko nikgenchimode ta•raken police-rangna u•iatskachina gitaba Home Minister, a•doko songdongenggipa manderangko didiataha.
Manderangni mikrake donganichisa Police department, manderangoniko koborrangko ra•na man•enga ineba ua mittelpile aganangaha.
Mongolbar salo boma gopretgipani bidingo police-rang am•sandianirangko dakengkuani gimin ua iani giminde mamingkoba aganna jechakskaaha.
Hynniewtrep National Liberation Council (HNLC) bobil dolni media ba kobor on•timgiparangna ka•mikkenataniko on•ani bidingo janapatengon, ian namen kragijani ong•a aro bobil dolni ka•mikkenataniko ra•pilna nanga ine Home Minister parakataha.
“Darangba media-ko drana bil dongja maina uamangni kaman Constitution-o pangchake Press Council of India (PCI)-ni dongimin niam gita manderangna koborko on•ani ong•a.
Media-ni kosako ka•mikkenataniara namen ra•chakna man•gijani ong•a aro iako uamang (HNLC) ra•pilna nangchongmota,” ine Rymbui aganaha.
Mongolbar salo Shillong songjinmani Laitumkhrah-o IED boma gopretanichi mande sakgni saknaanirangko man•na nangahachim. Ia boma gopretaniko HNLC dol a•kangatenba, uamangni bandh ong•atna parakaniko songbadrango sejahani gimin media-naba ka•mikkenataniko on•angahachim.
