Shillong, Aug 17: Shillong songjinmao so•sojengjeng ong•angani gimin curfew-ko ra•gatangani ja•man Mongolbar salo, manderang an•tangtangna nangchongmota bosturangko bree ra•rikna man•na gita mirong aro uandakgipa bosturangko palenggipa dokkanrangko dikdiksana kuliataha aro bang•a manderangan an•tangtangna nangchongmota bosturangko brena gita galamal dokkanrango tom•daktokaha.
Curfew-ko sorkari, Budbar pring 5:00 bajiona ra•gatangkuna tik ka•ahani gimin manderang, bang•batan galamal dokkanrangona re•bae an•tangtangna mirong aro uandake nangchongmotgipa bosturangko bree ra•riktokaha.
Shillong songjinmani Mawlai jolrango so•sojengjeng ong•angani ja•man ia jolrango dolgittam CRPF aro dolgni BSF sipairangko donataha aro batanggimin konta 24-ni gisepode ia jolrango maming so•sojengjeng ong•anirangko knasona man•jaha.
