Shillong, Aug 18: Adita salrangna skang, Shillong songjinmao ong·anggipa obostako Congress dol, Kabul songjinmani ramarango Taliban bobil dolni kamrang baksa tosusaaha.
Adita salrangna skang, Shillong songjinmao police-rangni AK-47 rifle-ko ra·seke mikkang katipgipa manderangni, ramarango re·jomanggipani bidingo janapatengon, salgro salaram a·dokrango niam retirangko manigija skatang dakanirangko nikna man·engaha ine Congress dolni dilgipa Randeep Singh Surjewala matnangataha.
“Afghanistan a·songo so·sojengjeng ong·anirangko an·ching mikrontangchi nikna man·engon salgro salaram a·dokrango ong·enggipa obostarangkode sorkari dongnuna jotton ka·skaenga. Afghanistan a·songode iandakgipa obostarangko an·ching nikna man·rongani gimin Taliban bobil dolni silchidare mesokaniko an·ching ma·sichakna man·aia indiba Shillong songjinmaoba an·ching mikkang katipgipa manderangni AK-47 rifle-ko mesoke ramao re·jomaniko nikna man·aha. Ian India sorkarini kamtango gisik nanggijaniko mesokani ong·a,” ine Congress dolni dilgipa parakataha.
Salgro salaram a·dokrango ong·enggipa obostarangko Modi sorkari knachakna gisiko nangjaengani a·selsa da·o salgro salaram a·dokrango indakgipa obostarangko nikna man·engaha ineba ua parakataha.
2018 bilsio an·tangko bame on·gipa HNLC-ni gitcham general secretary Cheristerfield Thangkhiew-ko police-rangni so·ote galani ja·man Robibar salo, Shillong songjinmao adita so·sojengjeng ong·anirangko nikna man·ahachim.
