Shillong, Dec 29: Drugs biji su·gipa video agal kama dake giproroako nike Laban Cirlce-ni Khasi Students’ Union (KSU) Kenches Trace jolo donggipa nokchamram a·damko chadrapna kam ka·on uano drugs jakkalgiparang donga ine u·ina man·aha.

Ua video ba jawilwato pekatgipa samrangko biji su·engako nikachim, aro uan manderangko nokchakram nok ine u·ina man·aha. KSU-ni matnanga gitade ua Shelter Home-ko Shillong Municipal Board (SMB) name nirokjaengani gimin uan namgija kamrangko ka·chakram biapsa ong·skaenga.

Jawilwatko nikani ja·mano Laban Police Station-ni policerang shelter home-ona re·ange niaha. Uamang bang·a syringe-rangko aro drugs donchakanirangko nikeaha. Indiba drugs biji su·giparangde katsoahani gimin saksakoba rim·na man·jaha.

Police dolni re·ange nion KSUni manderangba dongpaaha.

Ua biapko police dolni chadrape nieani ja·mano, indakgipa biaprangko namgija kamrangna jakkalaniko champengna gita kamrangko ka·china Shillong Municipal Board-ko KSU didiaha. Unbaksana, manderangna nok ba maiba jakkalchakram biapko para on·anioba name chekchina gita KSU dabiaha.