Tura, May 1: Re•anggipa April-ni 20 tariko, adita sak manderangni Sibbari Primary Health Centre (PHC)-ona re•ange, health centre-o kam ka•enggipa nurse-rangko kragija dake mesokahanina aro ia obostani bidingo ning•tue sandichenggija video-rangko social media-rango watpripraatahani gimin Meghalaya Government Nursing Services Association (MGNSA) aro Meghalaya Medical Services Association (MMSA) raken jegalataha.
Social media-rango watpripraatgipa video-rangoniko niksona man•ani gitade, ua somoio adita sak manderang, Sibbari PHC-ona re•angenba, PHC-o kam ka•enggipa nurse-rangni kosako kragija aro rakgipa kattarangchi aganeahachim aro ia video-rangko niksoani ja•man bang•a manderangan, kakketko sandichenggija PHC-o kam ka•enggipa nurse-rangko matnangna a•bachengtokahachim.
Ia obosta ong•gipani bidingo MGNSA aro MMSA, suk ong•gijaniko parakatengon, social media-rango watatgipa video-rangara, kakketko sandichenggija watgipa video-rangsan ong•aia aro iani a•sel PHC-o kam ka•enggipa nurse-rangni kosako manderang ong•gija dake chanchichipna draatako man•tokenga ine parakataha.
“Social media-rango watatgipa video-ra golponi baksakosan mesokaiaha aro uamang ia video-ko social media-rango watatna skang chingona re•bae kakketko sing•sandieba ra•chengjaha. Ian manderangni namgnina kamko ka•enggipa nurse-rangni gisiko chaktogijaniko ong•atenga. Bang•a manderangan ia video-ko nisoe ia obostani gimin ma•sisretenba chingni kosako ong•gija aro kragija kattarangchi agantokaha. Chinga ia kamko ka•engon, pilakan ku•cholsan ong•e kamko ka•enga aro iandake chingni kosako kragija kattarangchi agananirangko chinga ra•chakna man•chongmotjawa,” ine MGNSA-ni president JCK Sangma parakataha.
Sibbari PHC-o kam ka•enggipa mande saksani ia obostani gimin talatani gitade, April-ni 20 tarik attamo mande saksa bi•sa saksako rime, sanna bananiko ra•na gita PHC-ni emergency unit-ona re•angahani gimin PHC-o kam ka•enggipa nurse-rang una adita sanna bananirangko on•atahachim. PHC-ni emergency section-o an•chirangko porikka ra•e nina ostrorang dongjani gimin uamangko adita porikka ra•e, uamang PHC-o donge sannaniko ra•na nangnikgenma ine sing•on, uamang nokchi re•pilna aganaha aro uamangna nurse-rang samrangko on•e nokchi watatpilaiahachim.
Indake ong•genchimoba, adita somoirangni ja•man, jolni adita sak manderang, PHC-ona re•bae PHC-o kam ka•enggipa manderangko raka kattarangchi aganna a•bachengaha aro sannaniko ra•na re•bagipa mande sakgnina ORS-kosan on•e watataiaha ine nurse-rangko matnangeaha. Iani bidingo nurse-rang, uamangna talataniko on•na jotton ka•ahaoba jolni manderang, uamangni agananirangko knachakgija raka kattarangchisa aganaiaha.
Ja•mano, PHC-o kam ka•enggipa manderangni gisepo suk ong•gijani ong•katenba, lekka porani bidingo maiba katta ong•kataha aro iani ja•mano ong•a obostakosa social media-rango video ka•e watpripraataha ine PHC-o kam ka•enggipa mande saksa talataniko on•angaha.
Ia a•sel ong•ani ja•man salgipino, Sibbari PHC-o kam ka•enggipa manderang, police-rangna badi ka•doangaha aro ua apsan manderangan ja•mano PHC-ona re•bae nurse-rango kema bi•enba namgrikna aganaha. Indake ong•genchimoba uamangoni saksa, ia obosta ong•aniko video ka•e ra•enba, social media-rango watpripraatskaaha ine PHC-o kam ka•enggipa manderang parakataha.
