Baghmara, Feb 5: South Garo Hills a·jani ning·o donggipa Siju Songgital LP skul nokko ru·uta bilsirangna galchipe donengani gimin Garo Students Union (GSU), Siju Regional Unit mijal Bristibar salo South Garo Hills Sub Divisional Education Office (SDEO)na lekka sedoataha.

Siju Songgital LP skulko 1962 bilsion kuliahachim aro ia skulko kulichengonin songni bang·a manderang ia skulo poraitokachim ine agane, da·o ia skul nokni obosta namen namsrangjahani gimino iano skulko ka·na man·jaha ine GSU koborna u·iataha.

Indita bilsina ia skul nokko tarigija galchipe donani a·sel be·gruna am·engaha ine talatengon, ia skul nokni obostako ninapjae GSU, Siju Regional Unit, jolni SDEO-na lekka sedoaha ine GSU, Siju Regional Unit-ni padot Ralseng Marak koborna seachi janapataha.

Ua galchipe donako man·gipa skul nokko je cholchiba gong·rakkale nirokatpachina gita joltangni MLA aro a·dok sorkariko dingtangmancha GSU, Siju Unit mol·molangjolaha.