Gangtok, May 2: Koborko man·soani gita, mikkarang jime waanichi Sikkim a·dokni Nathula samba jolo jachanggipa tourist-rangko, Border Roads Organisation (BRO), mija Sombar salo naljokattokaha.

“Jachange donggipa tourist-rangna, BRO, project Swastik-ni Karamyogis, a·damtangon dongchakna gita biaprangko on·an baksa cha·ani-ringanirangkoba uamangna on·aha aro ramarangko watpilani ja·man, uamang gimikkon Gangtok-china watatpiltokaha,” ine Defence PRO koborna parakataha.

Mikkarang waanichi jachangenba neng·nikaniko chagronggiparangna, DG Lt General, Rajeev Chaudhry-ni dakdilanichi Border Roads Organisation-ni manderang nanga gita dakchakanirangko uamangna on·angaha ineba PRO agandapataha.

Iana skang, mija April jani skanggipa antio a·brini suurirang tanggitik ong·e ruruanichi salaram Sikkim samba jolo jachanggipa sak 350 tourist-rangkoba, Border Roads Organisation naljokattokaha, je obostaon saksni manderangni janggiba gimana gita nangahachim.