Gangtok, Oct 5: Sonibar salo, Gangtok-o Sikkim a•dokni gitcham Skotong Minister, Nar Bahadur Bhandari sagini chang 84-gipa atchiani salko manianiko dakangaha, jeon Sikkim a•dokni Skotong Minister Prem Singh Golay aro gipin cabinet minister-rangba bakko ra•angpaaha.
Bhandari, 1940 bilsio Soreng a•jani Malbasey minggipa biapo atchiaha. Ua 1979 bilsioni 1994 bilsiona a•dokni 2-gipa Skotong Minister ong•e kamko ka•angan baksana Nepal-rangoni skanggipa Skotong Minister ong•chenggipaba ong•aha. Ua 1984 bilsini 8-gipa Lok Sabha Election-o independent candidate ong•e dikdiksana MP-ni kamko jako ra•e ka•angaha.
1977 bilsio ua Sikkim Janata Parishad-ko a•bachengatahachim, jekon ua 1984 bilsio bon•atenba ia apsan bilsion, Sikkim Sangram Parishad (SSP) dolko a•bachengatskaaha.
SSP dol 1989 bilsio a•dokni election-ko ong•atanio dam 32 seat-rangko chegopaha.
1994 bilsio Bhandari, State assembly-o chakpaaniko man•jaenba, Skotong Minister-ni kamko jako ra•aniko watgalaha. Ia apsan bilsion, SSP dol, Pawan Kumar Chamling-chi dilenggipa Sikkim Democratic Front baksa susaanio sirikan baksana, 1999 bilsioba assembly election-o siriktaiaha. 2004 bilsio, Bhandari, Congress dolni gita susaaniko dakanioba chusokaniko man•rikjaha. Ua 1994 bilsioni 2004 bilsiona member of legislative assembly (MLA) ong•e kamko ka•angaha.
Bhandari aro uni jikgipa Dil Kumari Bhandari jean unomiting Lok Sabha-ni MP ong•engachim, Nepali ku•sikko Indian constitution-ni 8th schedule-o chapatna uni re•mikkangani gimin uko manderang da•alonaba gisik ra•aniko dakengkua, ia dabianiko 1992 bilsio ra•chakaniko dakangaha.
2007 bilsini May jao, ua tangka cha•ani bidingo jasana pattok ning•o donatako man•enba, 2014 bilsio CBI corruption case-o tangka cha•anio jak donga ine rim•ako man•aha.
Bhandari, 2017 bilsini July 16 tariko a•gilsakko watangaha.
Manderangni namgnina aro a•doko namroro silroroaniko ra•bana uni kimkim ong•e kam ka•anirangchi bang•a chu•sokanirangko man•aha. Indian constitution-ni 8th schedule-o Nepali ku•sikko chapaataniara namen gisik ra•na krabegipa ong•a, jean Nepali ku•sikko agangipa jatrangna bilkosan on•a ong•ja indiba a•songni gadango jatni dakbewalrangko radoaniba ong•aha, inenba Sikkim a•dokni Skotong Minister Golay, uni social media-o see parakataha.
Na·simang ia video-koba nina man·gen:
Na·simang iakoba poraina man·gen: Garo Hills-o mikkarang jimbee waani a•sel a•a rua aro chi ban reanio sak 10 sia, re•ruraanirang champengatako man•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
