Guwahati, Jan 31: Salgro Sikkim a·dokni suuriarigipa biapo jachange dongna nanggipa truck driver sakgittam aro uamang baksa re·chapenggipa manderangko man·chape gimik sakbonga manderangko Army-rang jokataha ine Robibar salo official-rang u·iataha.

Defence spokesperson Lt Col P Khongsai-ni u·iatani gitade, Sukrobar walni 9:00 aro 11:00 bajimangni gisepo, ia manderang, salgro Sikkim-ni Samdong aro Lachen-ni gisepo suurirang gape re·na man·gija dongengachim aro walni somoion Army-rang, ua biapona re·ange ia manderangko jokateaha.

Ua somoio ia manderang, Sikkim a·dokni Samdong-oni West Bengal a·dokni Siliguri-ona re·bapilengachim indiba ua biapo suurirang feet-gnina batpilahani a·sel re·na man·jae ua biapon jachange dongtokna nangengachim ineba Army official parakataha.

Ia manderangko ua biaponiko jokatani ja·man Army post-ona rimange, ua walo uamangna sam, cha·ani ringani aro ba·ra ding·arangko on·aha ineba ua u·iataha.