Silchar, June 7: Silchar PI court-o kamko ka•enggipa me•chik police, Sanchita Rani Roy, saksa ma•gipa ong•e, an•tangni bi•sako nirokna somoiko on•an baksana kamtangkoba name chu•sokatenga.

Ua an•tangni bi•sana somoiko on•an baksa kamtangkoba somoi gita ka•enganichi sakgipinrangna namako dakmesokgipa ong•aha.

Sanchita Rani Roy-ni bi•sa da•o jasnisan ong•kuengpiti indiba ua an•tangni bi•sako rime salantian kamtangona pring 10:30 bajion sokangrongachim.

Roy-ni kobor ra•timgiparangna aganani gitade, uni segipaba CRPF-o kam ka•gipa sipai ong•e dingtang biaposa dongna gita nangenga aro uni noko darangba dongjani gimin ua pangnan an•tangni bi•sako kamtangona rimbitesa re•barongenga.

Uamang Silchar songjinmani Malugram jolo nok para ra•e dongengachim.