Shillong, Sep 12: Sombar salo, a•dokni skotong Minister Pa Conrad K Sangma, batanggimin somoio songgigrikanio soi ka•grikaniko dakon ua jolni manderang baksa maming agangrikchengjaha ine warachakgipa dolni Chief Whip Pa George B Lyngdoh-ni matnanganina tol•e agane dilsretenggipa ine aganaha.
Tol•e agane dilsretenga ina kattako ra•e Assembly-o agangrikani ding•chaororoon aro skotong Minister-ni sima ari jolo songdonggipa baksa agangrikchengesa skanggipa bakni MoU-o soi ka•grika ine ga•chate aganengon, ian Assam sorkari baksa soi ka•grikani ja•man Hima-rang aro jolni manderang jegalaniko dakani ja•manosa agangrikaniko dakaha ine Pa Lyngdoh, Skotong Minister-ni kattako jegale aganskaaha.
Indake ong•engon, skanggipa bako jolni manderangko okame agangrikani aro a•damchinan re•kame nianiko dake manderangna u•iatanirangko janapan baksa saksa jinmani seokatako man•gipa, dai gnang agana nanggipa badiaba songbad setimgiparangna agana gita Assembly-ode dilsretani kattarangko agana nangja ine Skotong Minister ding•doe aganskaaha.
Skotong Minister-ni ding•doe agana kattarangna aro an•tangko tol•e dilsretenga ingipa kattana Pa George Lyngdoh-ba, tol•e aganenga ine saksa member-ni kosako agananiara ian Assembly-o ja•rikna nanggipa niam gita ong•ja aro unbaksa KHADC-an MoU-o soi ka•giminni kosako jegale chanchirimaniko dakpilahaode, Hima Mylliem-an jegale uni seata chittio janapahaode, jolni manderang Assam a•dok baksa chapatako man•a sikja ine jegale aganengon maikai tol•gipa ine agana man•a aro maina skotong Minister kakketko janapa kattana gisik sana nanga ine ding•doe sing•doskaaniko dakan baksa gnigipa bakni bidingo soi ka•grikaniko sorkari jolni manderang baksa agangrikchengesa dakna nanga ine warachakgipa dolni Chief Whip aganaha.
Skotong Minister Pa Conrad Sangma, agangrikani dongja ingipa kattani giminsa tol•gipa ina kattako jakkalaia maina ra•chakgrikna man•a ba man•gijade dingtang kattasa ine aganan baksa gnigipa bakni sima arina soi ka•grikanioba agangrikchengesa kam ka•gen ine ku•rachakan baksa sima arini mamlako politics kal•jachinaba mol•molangaha.
