Shillong, July 7: Kajia-golmal gnanggipa Assam aro Meghalaya-ni sima-ariko nirokatani bidingo consultative committee-ko songpiltaichina gita sorkario mol·mole, Hill State People’s Democratic Party-ni padot KP Pangiang, Butbar salo Meghalaya-ni Chief Secretary-na lekka sedoangaha.
Da·o MDA sorkari baksa bakrimenggipa HSPDP dol, iana gisiko nanggiparangko man·chapate committee-ko songchinaba mol·molataha.
“Committee-ni sandie man·anirango pangchake, nangchongmotako ma·sina gita, uni gadang aro mairangko nangenga sorkarina agan-ku·pattianirangko on·ani gimin aro ming 12 dingtanggrikani gnanggipa bakrangni gimin pilak nangchongmotgiparangko talatachi report-ko on·na nanggen,” ine Pangiang chittio janapataha.
Gimikchikon nigrike kamko ka·na man·gipa aro ra·chakna man·gipa namgrikatani cholrangko am·china gitaba uamang dol ku·pattiangan baksa, iani bidingo somoiko on·giminni gisepon committee-ni agan-ku·pattianirangko sorkarina on·angchinaba chinga committee-na agan-ku·pattianiko on·a ineba Pangiang janapataha.
Batanggimin 2019 bilsini September 3 tariko on·anggipa chittikoba uamang on·chapataha aro India-ni niam-bidikni sixth scheduled-ko namdapatani gimin taldapataniko on·china am·ataha.
On·sregrikani policy ba bewalko dakani gimin aganengon, ian nambatgipa mingsa policy ong·a ine aganenba, ge·gipin policy-ara jinmani namnikaniko am·anian ong·a aro iaba ru·uta bilsirangna kingking namatna man·gijagipa mamlako changsano namgrikatani mingsa chol ong·enga,” ine Pangiang janapatkuaha.
Indake ong·engon, a·dok damgnini sima-arini kajia-golmalni gimin Assam a·dokni skotong minister Pa Himanta Biswa Sarma baksa agan-golpogrikangaha ine a·dokni skotong minister Pa Conrad K Sangma, adita salrangna skang parakangahachim.
Unbaksana, sima-arini golmalko namgrikatna kamko ka·china Meghalaya aro Assam-koba Union home minister agan-ku·pattiataha ineba nikna man·gen.
