Shillong, Jan 23: Salgro salaram a·dokrangni sima ari jolrango meligrikgijanirangko 2022 bilsini gisepon namatchina gita ma·mong sorkari ge·etaniko on·angaha.
Re·baenggipa 2022 bilsio India a·songni bilsi 75 gapaniko maniani somoio a·songni Prime Minister a·songna aganprakatengon, salgro salaram a·dokrangni sima ari jolrango meligrikgijanirangko namatna man·na nangaha ine da·al Sonibar salo Union Minister Amit Shah parakataha.
Union Home Minister-ni agananggipa kattarangko jinmana parakatskaengon, “Re·baenggipa 2022 bilsini August 15 tariko a·songni bilsi 75 gapaniko manie a·songni jakgitelaniko maniani somoio a·songni Prime Minister jinmana aganprakengon, salgro salaram a·dokrangni sima jolrango meligrikgijnairangko namatna man·aha ine aganna man·china Home Minister, salgro salaram a·dokrangko didiangaha,” ine Meghalaya a·dokni Chief Minister Conrad Sangma parakataha.
India aro Bangladesh a·songni gisepo ru·utbea bilsirangna meligrikgijaniko 2015 bilsio namatna man·aha ine toe aganangengon, a·song damgnini sima jolrango meligrikgijanirangko namatna man·enga ong·ode maini gimin a·dok damgnini gisepo meligrikgijaniko namatna man·jaenga ine Home Minister sing·doangaha.
“India aro Bangaldesh a·songni sima ari jolrango meligrikgijanikon namatna man·aha ong·ode maini gimin a·song ning·on a·dok damsa a·dok damgipin baksa aro mongsongbate Assam aro Meghalaya a·dokni gisepo namatna man·jaenga ine Home Minister, ia meligrikgijanirangko namatchina didiangaha,” ine Amit Shah-ni agananggipa kattarangni gimin Sangma parakataha.
Conrad Sangma-ni parakatani gitade, NEC-ni tom·anio salgro salaram a·dokrangni dingtang dingtang nanganirangni bidingo aro mongsongbate salgro salaram a·dokrango ong·enggipa obostarangko namatani bidingo Union Home Minister chanchirimdilangaha.
Salgnina ong·atenggipa NEC-ni chang 69-gipa tom·bimonganiko da·al Sonibar salni bako Union Home Minister aro NEC-ni Chairman Amit Shah, do·ga oe on·angahachim aro ia tom·aniko a·bachengatani somoio DoNER Ministry-ni Minister of State (Independent Charge) aro NEC-ni Vice Chairman Dr Jitender Singh baksana gipin dilgiparangba dongpae bak ra·angahachim.
