Tura, Sept 8: Constitution-ni Sixth Schedule-ko taridapanio Nokmarangna on·gimin bilo maming nangchakeani dongjana gita aro A·chik a·songo chengonin ja·rikbaenggipa daka rikanirango maming dingtangani dongjachina gita dabie Budbar salo Garo Hills gimikni Nokmarang, Tura-o jinma tom·e re·jomaniko ong·atangaha.Jinma re·jomaniko ong·atna skang, dingtangmancha jinma tom·bimonganiko Tura Balading-o donggipa Nokma Council-ni office mikkango ong·atangaha aro ia tom·bimonganio Garo Hills gimikni Nokmarang aro dingtang dingtang dolrangba bakko ra·angaha.Ia tom·bimonganio Nokma Sanerang aro dingtang dingtang dilgiparang, Sixth Schedule-ko taridapanio Garo Hills-o village council-ko songna gita Meghalaya sorkarini recommend ka·na manchianiko raken jegalangtokaha.Sixth Schedule-ko taridapna skang, jinma baksa agangrikchengchina aro Tribal-rangni a·jako chel·chakna man·na gita Garo Hills-o songdongenggipa manderangni aro Nokma Sanerangni nangnikanirangko ra·china gitaba ia tom·anio Nokmarang aro dingtang dingtang dolrang dabiangtokaha.Ia tom·e re·jomaniko ong·atanio Garo Hills-ni Nokmarang baksana GSU, AYWO, ADE, FAF, FKJGP, GGU, Bar Association aro uandakgipa dingtang dingtang dolrangba bakko ra·angaha.

Sixth Schedule-ko taridapanio A·chikrangni daka rikanirango aro Nokma Sanerangna on·gimin bilrango maming nangchakeani dongjana gita Nokmarang, a·dokni Chief Minister Conrad K Sangma-ko gronge memorandum-ko on·na gitaba ia tom·anio tik ka·e donangaha.