Shillong, Aug 23: Constitution-ni Sixth Schedule-o donggipa Para 12 A (b)-ko taridapchina ma·mong sorkariko didina gita official resolution-ko ra·ani bidingo Hill State People’s Democratic Party (HSPDP), MDA sorkarina seatna tik ka·angaha.
Sombar salo, HSPDP-ni Central Executive Committee (CEC) tom·e chanchirimangenba, iani bidingo a·dok sorkarina seatna tik ka·angaha.
Iani bidingo kobor ra·timgiparangna talataniko on·angengon, “Sixth Schedule-ni Para 12 A (b)-ko taridapna gita da·o ong·atna sienggipa Assembly-ni Autumn Session-o government resolution-ko ra·china chinga a·dokni Chief Minister Conrad K Sangma-na seatgen,” ine HSPDP-ni secretary aro Cabinet Minister Renikton Lyngdoh Tongkhar parakataha.
Lyngdoh-ni parakatani gitade, Sixth Schedule a·jarango ma·mong sorkarini niamrangko ra·gatjana gita a·dokko bilakbatatanian ia niamko taridapani ong·genchim.
Iani bidingo Chief Minister, Cabinet-ona ra·ange chanchirimdilgen ineba HSPDP-ni dilgipa, an·tangni ka·dongchakenganiko parakataha.
Chittiko HSPDP-ni dilgiparang, August-ni 25 tariko sorkarina on·atgen ineba Tongkhar parakataha.
Ia Sixth Schedule-ni Para 12A-ara Parliament-ni niamrango aro Meghalaya a·dokni autonomous district aro autonomous a·jarango nangchakegipa niamrang ong·a aro section (b)-o janapani gitade, Meghalaya a·dokni autonomous district ba autonomous region ba je bakrangoba Parliament-ni maming niamrang nangchakeani dongjana gita President u·iataniko on·na man·gen.
