Shillong, June 27: 2023 bilsini Meghalaya Assembly election-o National People’s Party (NPP)-ko bilakbatatna gita skanggipa changna Mylliem constituency-o NPP-ni candidate-ko susaatgen ine Sombar salo, NPP-ni national president aro Meghalaya a•dokni Chief Minister Conrad K Sangma parakataha.
Sangma-ni parakatani gitade, re•baenggipa 2023 bilsini Assembly election-o NPP dol man•a dipet pilak constituency-rangon candidate-rangko susaatna miksongenga aro ia changoba NPP, bang•a constituency-rangon chegipa ong•na ka•dongenga.
Da•o dipet Mylliem constituency-o NPP-chi dilenggipa Meghalaya Democratic Alliance (MDA)-o bakrimenggipa People’s Democratic Front (PDF)-ni Hamletson Dohling, MLA ong•engachim ine nikna man•a indiba re•baenggipa 2023 bilsini Assembly election-o NPP dolba Mylliem constituency-o candidate-ko susaatna tik ka•ahani gimin da•o ia constituency-o PDF aro NPP dolni gisepo susagrikskana nanggnok.
Mylliem-o NPP-ni office-koba songe donmanaha aro ia office-ko NPP-ni national president Conrad K Sangma, Sombar salo re•ange nieaha.
