New Delhi, Mar 10: Sukrobar salo, skanggipa changna India-Australia a•song damgnini Annual Summit-ko New Delhi songjinmao ong•atangaha aro ia tom•anio a•song damgnian, nangrime kam ka•anio bilakbatatna ku•rachakgrikangaha.
Ia tom•anio a•song damgnian, kal•susaani aro audio-visual co-production-o bakrimna gitaba Memorandum of Understanding (MoU)-o soi ka•grikangaha.
Ia tom•anio India a•songni Prime Minister Narendra Modi aganprakengon, a•song damgnini gisepo nangrime kam ka•aniko bilakbatatna gita chanchirimaha ine parakataha.
Indo-Pacific jolrango bakrime chel•chakaniko bilakbatatna gitaba a•song damgnini gisepo chanchirimaha ineba PM Modi parakataha.
India aro Australia a•song damgnian Quad-ni membor-rang ong•a ine janapatengon, ia bilsini May jao Quad Leaders Summit-ko ong•atengani gimin ua Australia a•songona re•anggen ine MP Modi parakataha.
Australia a•songo Hindu-rangni olakkiram nokrangko chadrapengani gimin ua Australia-ni Prime Minister baksa agangrikaha ine janapatengon, Australia a•songo songdongenggipa India a•songni manderangna naljokaniko on•na gita Australia a•songni Prime Minister Anthony Albanese ku•rachakangaha ine PM Modi parakataha.
Ia tom•anio Australia a•songni Prime Minister Anthony Albanese-ba aganprakengon, Australia aro India a•songni gisepo nangrimaniara dingtang dingtang gadangrango ong•a ine parakangaha.
A•song damgnini gisepo agangrikjringanichi bang•a kamrangon bakrime kam ka•anirangko bilakbatatna man•aha ineba Albanese aganaha.
Iana skang, India a•songni External Affairs Minister Dr S Jaishankar-ba Australia a•songni Prime Minister Anthony Albanese-ko gronge dingtang dingtang kamrangni bidingo agangrikangaha.
