Shillong, May 11: COVID-19 sajinmani tikarangko su·e ra·tokchina gita Meghalaya-ni West Khasi Hills district-o pilak skie on·enggiparangko didiatengon, jemangan ia tikako su·na jechaka uamang sastiko man·gen ine mikrakataniko on·aha.
West Khasi Hills Nongstoin-ni Deputy Commissioner-ni ge·etanio pangchake, District School Education Officer, district-ni private aro sorkarini chalaigipa skulrango skie on·enggipa sakantikon sabisini tikarangko su·angtokchina didianiko on·angaha. COVID sabisiko man·giparangni ta·raken giproroengani gimino pilak skulrangni Headmaster ba Headmistress ba Principal-rangna iani bidingo chittirangkoba sokataha.
Chittio indine janapataha, “Skigiparang mongsongbate gipin skigiparang aro chatro-chatrirang baksa brine skie on·aniko dakna nangani gimin sabisiko giproroatna gita altua. Unbaksana, indin on·enggipa tikako su·na gita bilsi 18 batgiparangni bimingrangko vaccination portal-o segatna gita skigiparang, a·doko songdongenggipa manderangnaba dakchakna nanga.”
“Tika su·na jechakgipa skigiparang, sal 10 prakon RTCPR porikkako ka·na nanggen aro COVID sabisiko man·gijani ba negative ong·ani report-ko mesokna nanggen, aro iako dakja ong·ode skigiparang maming dakeba skulo bi·sarang baksa brine skie on·anirangko dakna man·jawa aro maibakai saa donggipa baksa bak man·chapako sandiatanio COVID-19 saaniko ra·bitgipa ine rim·a man·ode niamo pangchake uamangko rim·gen,” ineba chittio janapatjolaha.
